काठमाडौँ । विशेषज्ञ आयुर्वेद चिकित्सक समाज नेपालको तेस्रो राष्ट्रिय अधिवेशनले दुईवर्षे कार्यकालका लागि डा.पुनेश्वर केशरीको नेतृत्वमा नयाँ कार्यसमिति निर्विरोध निर्वाचित गरेको छ।
राजधानीमा शुक्रबारदेखि सुरु भएको समाजको अधिवेशनले नयाँ नेतृत्व निर्विरोध निर्वाचित गरेको सभापति केशरीले जानकारी दिनुभयो। कार्यसमितिको उपसभापतिमा डा.निर्मल भुसाल,सचिवमा डा.निश्चल गुप्ता,कोषाध्यक्षमा डा.मदन भण्डारी निर्विरोध निर्वाचित हुनुभएको हो।
यसैगरी समाजको सदस्यहरुमा डा.काजल झा,डा.विशुनदयालप्रसाद पटेल,डा.साधना पराजुली र डा.प्रशन्न नेपाल निर्वाचित हुनुभएको छ। अधिवेशनको शुक्रबार विदुषी योगमाया हिमालयन आयुर्वेद विश्वविद्यालय परिषद्का अध्यक्ष डा.अर्जुन कार्कीले उद्घाटन गर्नुभएको थियो। समाजको स्थापना वि.सं. २०६५ मा भएको हो।
हाल नेपालमा आयुर्वेदका १८७ जना विशेषज्ञ चिकित्सक छन्। आयुर्वेदका विशेषज्ञ चिकित्सकलाई एलोपेथिकभन्दा फरक व्यवहार गरिएपछि तिनलाई उपयुक्त काम गर्ने अवसर दिने उद्देश्यले समाजको स्थापना भएको संस्थापक अध्यक्ष डा.देवकला भण्डारीले जानकारी दिनुभयो।
करिब एक दशकसम्म भने समाज निष्क्रिय रहेकाले केशरीको संयोजकत्वमा तदर्थ समिति गठन गरी तेस्रो अधिवेशनबाट समाजलाई निरन्तरता दिइएको जनाइएको छ। समाजले नेपालमा आयुर्वेदको प्रवर्द्धनका लागि सरोकार भएका निकायसँग सहकार्य गरी काम गर्ने सभापति केशरीरले बताउनुभयो।रासस
