धादिङ। बाढीपहिरोलगायत विपदबाट प्रभावित नागरिकको स्वास्थ्य उपचारमा सहयोग पुर्याउने उद्देश्यले आयुर्वेद क्षेत्रका तीन संस्थाले धादिङको गल्छी गाउँपालिकालाई ७ लाख ८० हजार रुपैयाँ बराबरको औषधि तथा राहत सामग्री हस्तान्तरण गरेका छन्। भदौ १० गते गएको विपदबाट प्रभावित क्षेत्रलाई लक्षित गर्दै सञ्चालन गरिएको ‘अनन्तदृष्टि दिव्य यात्रा’ को दोस्रो चरणअन्तर्गत नेपाल आयुर्वेद औषधि उत्पादक संघ, नेपाल आयुर्वेद चिकित्सक संघ र नेपाल आयुर्वेद औषधि व्यवसायी संघको संयुक्त पहलमा राहत सामग्री हस्तान्तरण गरिएको हो।
कलंकीबाट औषधि तथा राहत सामग्रीसहित धादिङ पुगेको टोलीले गल्छी गाउँपालिकामा आयोजित कार्यक्रममा गाउँपालिका अध्यक्ष केदारनाथ खतिवडा, उपाध्यक्ष भाइ काजी तिवारी, औषधालयका कविराज नारायण पौडेललगायतको उपस्थितिमा औषधि हस्तान्तरण गरेको थियो। राहत अभियानमा नेपाल आयुर्वेद औषधि उत्पादक संघका अध्यक्ष बुद्धिमान शाक्य, नेपाल आयुर्वेद चिकित्सक संघका महासचिव डा. ऋषिकेश भूसाल र नेपाल आयुर्वेद औषधि व्यवसायी संघका महासचिव लेखनाथ भूसालसहित तीनै संस्थाका पदाधिकारी सहभागी थिए।
विपद्पछि प्रभावित क्षेत्रमा चोटपटक, संक्रमण, पानीजन्य तथा अन्य स्वास्थ्य समस्या देखिन सक्ने भएकाले औषधिको आवश्यकता बढ्ने अवस्थालाई मध्यनजर गर्दै सहयोग गरिएको आयोजक संस्थाहरूले जनाएका छन्। उनीहरूले विपद्को समयमा औषधि उपचारमा राज्यका स्वास्थ्य संरचनालाई सहयोग पुर्याउनु सामाजिक उत्तरदायित्वसमेत भएको बताएका छन्।
यो अभियानअन्तर्गत यसअघि भदौ १७ गते नुवाकोटस्थित आयुर्वेद तथा वैकल्पिक चिकित्सालयलाई ७ लाख ४८ हजार रुपैयाँ बराबरको औषधि हस्तान्तरण गरिएको थियो। गल्छीमा गरिएको सहयोग दोस्रो चरणको कार्यक्रम हो। आयुर्वेद क्षेत्रका तीन संस्थाले विपद् प्रभावित नागरिकको स्वास्थ्य संरक्षणमा आफ्नोतर्फबाट निरन्तर सहयोग गर्ने प्रतिबद्धता जनाएका छन्। राहत अभियानले विपदमा परेका नागरिकलाई औषधि सहयोगसँगै मानवीय सहकार्य र सामाजिक उत्तरदायित्वको सन्देशसमेत दिएको छ।
