“रुसी आक्रमणमा चार जनाको मृत्यु, धेरै घाइते”

युक्रेनी अधिकारीहरूले जनाए अनुसार, राति किएभमाथि भएको रुसको आक्रमणमा चार जनाको मृत्यु भएको छ भने शहरका विभिन्न भागमा भवन र संरचना नष्ट भएका छन् ।

युक्रेनका राष्ट्रपति भोलोडिमिर जेलेन्स्कीले यस आक्रमणलाई ‘जनताको र नागरीय संरचनामा अधिकतम क्षति पु¥याउने उद्देश्यले योजनाबद्ध गरिएको’ भन्नुभयो । उहाँले बताएअनुसार, यस आक्रमणमा करिब ४३० ड्रोन र १८ मिसाइल प्रयोग गरिएको थियो । यसबाट धेरैजना घाइते भएका छन्, जसमा एक गर्भवती महिला पनि समावेश छ ।

किएभका सैन्य प्रशासन प्रमुख टिमुर टकाचेन्कोले सामाजिक सञ्जालमा लेख्नुभयो,“लगभग सबै जिल्लामा उच्च भवनहरूमा क्षति पुगेको छ । युक्रेनी आपतकालीन सेवा कर्मचारीहरूले आगलागी र ध्वंसबाट दर्जनौं मानिसहरूलाई उद्धार गरेका छन् । प्रहरीका अनुसार, नौ जिल्लाका ३० आवासीय भवन क्षतिग्रस्त भएका छन् ।”

किएभका मेयर भिटाली क्लिच्कोका अनुसार, डेस्न्यान्स्की र पोदिल जिल्लाका केही भागहरू अस्थायी रूपमा हीटिङ सेवा बिना रहेका थिए, तर बिहानसम्म सबै समस्या समाधान गरिएको छ । यातायात पनि आंशिक रूपमा अवरुद्ध भएको थियो, जसका कारण बस र ट्रामहरू ढिला भएका थिए ।
यस आक्रमणको पृष्ठभूमिमा पश्चिमी मित्र राष्ट्रहरूले रुसमाथि दबाब बढाइरहेका छन् । बुधबार क्यानडाले रुसका ड्रोन र ऊर्जा उत्पादनसँग सम्बन्धित नयाँ प्रतिबन्धहरू घोषणा ग¥यो । त्यही दिन, सात विकसित राष्ट्र (जी७) का विदेश मन्त्रीहरूले युक्रेनमा तत्काल युद्धविरामको आग्रह गर्दै ‘अटल समर्थन’ व्यक्त गर्नुभयो ।

युद्ध सुरु भएको करिब चार वर्ष बितिसकेको छ, तर दुवै पक्षले स्थिति मजबुत बनाएका छन् । मास्कोले युद्धविरामका प्रयास अस्वीकृत गर्दै आएको छ भने अमेरिकी राष्ट्रपति डोनाल्ड ट्रम्पले पुनः शान्ति सम्झौता प्रयास गरेका थिए ।
पूर्वी युक्रेनमा मास्कोका सेना डोनेट्स्क र लुहान्स्क क्षेत्रको नियन्त्रण प्रयास गरिरहेका छन् । विशेषज्ञहरूले रुसको ऊर्जा संरचनामा हालैका हानिले युक्रेनमा हिउँदे महिनामा हीटिङ संकट निम्त्याउन सक्ने चेतावनी दिएको छ ।

युक्रेनले पनि रुसको संरचनामा आक्रमण तीव्र पारेको छ र सीमाभन्दा पर पनि हमला गर्ने प्रयास जारी राखेको छ । रुसले युक्रेनी ड्रोन २०० भन्दा बढी मार्न सफल भएको जनाएको छ । यसैबीच, क्रास्नोडार क्राईमा शेस्खारिस तेल प्रशोधन कारखानामा आगलागी भएको थियो, जसलाई नियन्त्रणमा लिइएको छ । त्यहाँको एउटा नागरिक जहाज पनि क्षतिग्रस्त भएको थियो र तीन जना कर्मचारी घाइते भएर अस्पताल भर्ना भएका छन्।रासस