काठमाडौं । नेपाल फर्मा एक्स्पो २०८२ का अवसरमा आयोजित क्रिकसल प्रतियोगिताको उपाधि नेपाल फर्मास्युटिकल्स ल्याब (एनपिएल) ले जितेको छ ।
एसोसिएसन अफ फर्मास्युटिकल प्रोड्युसर्स अफ नेपाल (एप्पोन) को मार्केटिङ सर्कलद्वारा फागुन ८ र ९ गते आयोजना गरिएको क्रिकसल प्रतियोगिताको फाइनल खेलमा एसियन फर्मास्युटिकल्सलाई पराजित गरी एनपीएलले उपाधि हात पारेको हो ।
विजेता एनपिएलले ३० हजार रुपैयाँसहित ट्रफी तथा प्रमाणपत्र र उपविजेता एसियन फर्मास्युटिकल्सले १५ हजार रुपैयाँसहित ट्रफी तथा प्रमाणपत्र प्राप्त गरेका छन् । विजेता र उपविजेता टोलीलाई एप्पोनका महासचिव तथा एक्स्पो संयोजक सन्तोष बरालले पुरस्कार वितरण गरेका थिए ।
क्रिकसल प्रतियोगितामा नेपाल फर्मास्युटिकल्स ल्याब, एसियन फर्मास्युटिकल्स, देउराली जनता फर्मास्युटिकल्स, लोमस फर्मास्युटिकल्स, म्याल्नस फर्मा, नेपाल रेमेडिज, फर्मोनिक्स लाइफ साइन्स र क्वेस्ट फर्मास्युटिकल्स गरी जम्मा आठ टोलीको सहभागिता रहेको थियो ।
एप्पोन मार्केटिङ सर्कलका संयोजक दिपेश प्रधानका अनुसार फर्मा उद्योगका कर्मचारी तथा बजार प्रतिनिधिहरूबीच सहकार्य र मनोबल अभिवृद्धि गर्ने उद्देश्यले नेपाल फर्मा एक्स्पोको पूर्वसन्ध्यामा क्रिकसल आयोजना गरिएको थियो ।
नेपाल फर्मा एक्स्पो २०८२ को दशौँ संस्करण काठमाडौंको भृकुटीमण्डपमा यही फागुन २८ देखि ३० गतेसम्म आयोजना हुँदैछ ।
