‘राधा क्यान्सर सचेतना तथा हिंसाविरुद्धको राष्ट्रिय पत्रकारिता पुरस्कार’ सरोज ढुङ्गेललाई

काठमाडौँ । राधा क्यान्सर सचेतना फाउन्डेसनले स्थापना गरेको ‘राधा क्यान्सर सचेतना तथा हिंसाविरुद्धको राष्ट्रिय पत्रकारिता पुरस्कार’ यस वर्ष गोरखापत्र दैनिकका स्वास्थ्य पत्रकार सरोज ढुङ्गेललाई प्रदान गरिएको छ । नवलपुरको कावासोती नगरपालिका–२ मा आयोजित विशेष कार्यक्रममा ढुङ्गेललाई नगद २० हजार रुपैयाँसहित प्रमाणपत्र प्रदान गरिएको हो ।

कार्यक्रमका प्रमुख अतिथि स्वास्थ्य सेवा विभाग परिवार कल्याण महाशाखाअन्तर्गत बाल स्वास्थ्य तथा खोप शाखाका प्रमुख डा. अभियान गौतमले पुरस्कार वितरण गर्दै पछिल्लो समय नेपाल मात्र नभई विश्वमै क्यान्सरजस्ता नसर्ने रोग भयावह बन्दै गएको बताउनुभयो । उहाँले नसर्ने रोगका कारण मृत्यु दर बढ्दो क्रममा रहेको उल्लेख गर्दै दैनिक करिब १० जनाको मृत्यु हुने गरेको जानकारी दिनुभयो ।

डा. गौतमले क्यान्सर रोगको समयमै पहिचान गरी उपचार गर्न सके पूर्णरुपमा निको हुन सक्ने भएकाले प्रारम्भिक जाँच र सचेतनामा जोड दिनुपर्ने बताउनुभयो । जनचेतनाको लागि संचार माध्यमको भूमिका महत्वपूर्ण हुने उहाँको भनाइ छ ।

पुरस्कार ग्रहण गर्दै पत्रकार ढुङ्गेलले यस सम्मानले स्वास्थ्य क्षेत्र, विशेषगरी क्यान्सर जस्ता नसर्ने रोगका विषयमा कलम चलाउन थप प्रेरणा मिलेको बताउनुभयो । उहाँले सरकारले उपचारमा भन्दा पनि क्यान्सर रोकथाममा लगानी बढाउनु पर्नेमा जोड दिनुभयो ।

फाउन्डेसनका अध्यक्ष एवं पत्रकार प्रकाश बस्यालले महिला हिंसा न्यूनीकरणका लागि सबैभन्दा पहिले समाजको सोच परिवर्तन गर्नुपर्नेमा जोड दिनुभयो । उहाँले हरेक घरमा छोरीहरूलाई खुलेर बोल्न सक्ने वातावरण बनाउनुपर्ने बताउनुभयो । समाजको डरले हिंसा लुकाउने प्रवृत्ति रहेकाले छोरीहरूलाई सक्षम बनाउनुपर्ने उहाँको भनाइ थियो ।

२०४८ साल फागुन ९ गते जन्मनुभएकी पत्रकार राधा बस्यालको २०७७ साल कात्तिक १४ गते स्तन क्यान्सरका कारण निधन भएको थियो । एक दशकभन्दा लामो समयदेखि नवलपुरमा पत्रकारिता गर्दै आउनुभएकी राधाले वैवाहिक जीवनपछि व्यक्तिगतरुपमा घरेलु हिंसा र क्यान्सरसँग संघर्ष गर्नुपरेको उहाँका बुबा शुभराज शर्मा बस्यालले बताउनुभयो ।

आफूलाई क्यान्सर भएको थाहा पाएपछि राधाले महिला हिंसा र स्तन क्यान्सरबारे सचेतना फैलाउने उद्देश्यले राधा क्यान्सर सचेतना फाउन्डेसन स्थापना गरी गाउँगाउँमा तथा रेडियो मध्यविन्दु एफएममार्फत अभियान सञ्चालन गर्नुभएको थियो । उहाँको निधनपछि फाउन्डेसनलाई उहाँका भाइ प्रकाश बस्यालले निरन्तरता दिँदै आउनुभएको छ ।