स्वास्थ्य बीमा कार्यक्रम राष्ट्रिय परिचय पत्रसँग जोडिने

काठमाडौँ । स्वास्थ्य बीमा कार्यक्रमलाई विश्वनीय र प्रविधिमैत्री बनाउने गरी स्वास्थ्य बीमा बोर्ड र राष्ट्रिय परिचयपत्र तथा पञ्जीकरण विभागबीच समझदारी गरिएको हो।

सोमबार राष्ट्रिय परिचयपत्रमा रहेको विवरण र नम्बरलाई स्वास्थ्य बीमा प्रणालीमा आबद्ध गर्ने गरी दुई निकायबीच समझदारी पत्रमा हस्ताक्षर भएको छ। राष्ट्रिय परिचयपत्र तथा पञ्जीकरण विभागमा आयोजित कार्यक्रममा स्वास्थ्य बीमा बोर्डका कार्यकारी निर्देशक डा.कृष्ण प्रसाद पौडेल र विभागका महानिर्देशक नमराज घिमिरेले सयुक्त रुपमा समझदारी पत्रमा हस्ताक्षर गर्नुभयो ।
सम्झौता अनुसार अब स्वास्थ्य बीमा बोर्डले ‘राष्ट्रिय परिचय व्यवस्थापन सूचना प्रणाली’ मार्फत विद्युतीय सेवाहरूको प्रयोग गर्नेछ। यस सहकार्यले नागरिकको पहिचान डिजिटल रूपमा प्रमाणीकरण गर्न सहज हुनेछ। राष्ट्रिय परिचय नम्बरलाई बीमासँग जोड्दा प्रणालीमा थप सहज, सुरक्षित, छिटो र भरपर्दो हुने आशा गरिएको छ।

बोर्डका कार्यकारी निर्देशक डा.कृष्ण प्रसाद पौडेलले बीमामा देखिएको दोहोरोपनाको समस्या हटाउन, बास्तविक व्यक्तिको एकिन गर्न तथा सेवाग्राहीलाई छिटो छरितो ढंगले सेवा उपलव्ध गराउन राष्ट्रिय परिचयपत्रसंग जोडिनु महत्वपूर्ण हुने बताउनु भयो ।