काठमाडौं । बढ्दो स्वास्थ्य समस्याका रूपमा देखिएको मोटोपनसम्बन्धी दोस्रो अन्तर्राष्ट्रिय सम्मेलन काठमाडौंमा सुरु भएको छ। सम्मेलनमा मोटोपनका कारण उत्पन्न स्वास्थ्य समस्या, उपचारका विधि, औषधि प्रयोग तथा जीवनशैली व्यवस्थापनका विषयमा विस्तृत छलफल भएको छ।
साउथ एशियन ओबिसिटी फोरमको आयोजनामा सुरु भएको सम्मेलनमा विभिन्न देशका विज्ञहरूको उल्लेखनीय सहभागिता रहेको छ। सम्मेलनमा दक्षिण एशियाका विभिन्न मुलुकसहित अन्य देशबाट आएका १०० भन्दा बढी अन्तर्राष्ट्रिय विज्ञ र करिब ४०० जना सहभागी रहेका छन्।
सम्मेलनको पूर्वसन्ध्यामा आयोजित पत्रकार सम्मेलनमा फोरमकी अध्यक्ष तथा इन्डोक्राइनोलोजिस्ट डा.डिना श्रेष्ठले दक्षिण एशियाली क्षेत्रमा मोटोपन तीव्र रूपमा बढ्दो स्वास्थ्य समस्याका रूपमा देखिएको बताउनुभयो। उहाँले यस समस्यालाई नियन्त्रण गर्न साझा रणनीति आवश्यक भएकाले सम्मेलन आयोजना गरिएको जानकारी दिनुभयो।
सम्मेलनमा सहभागी भारत, श्रीलंका, पाकिस्तान र बंगलादेशका विज्ञहरूले मोटोपन नियन्त्रणका लागि क्षेत्रीय स्तरमै समन्वय गरेर काम गर्नुपर्ने धारणा व्यक्त गर्नुभयो। उहाँहरूले मोटोपनका कारण मधुमेह, मुटुरोग, मिर्गौला समस्या तथा श्वासप्रश्वाससम्बन्धी रोगहरू बढ्दै गएको उल्लेख गर्दै यसलाई बेवास्ता गर्न नहुनेमा जोड दिनुभयो।
उहाँहरूले मोटोपनलाई दुई प्रकारमा वर्गीकरण गर्न सकिने बताउनुभयो। एक प्रकार बाहिरबाटै देखिने मोटोपन हो भने अर्को शरीर बाहिर सामान्य देखिए पनि भित्री अंगमा हुने मोटोपन रहेको उहाँहरूको भनाइ छ। विशेष गरी भित्री मोटोपन अझ जोखिमपूर्ण हुने भएकाले नियमित स्वास्थ्य परीक्षण आवश्यक रहेको उहाँहरूले बताउनुभयो।
कार्यक्रममा आयोजक संस्थाका तर्फबाट वरिष्ठ इन्डोक्राइनोलोजिस्ट तथा लाइफस्टाइल कोच समेत रहनुभएका डा. सन्तोष शाक्यले मोटोपन नियन्त्रण व्यक्तिगत प्रयासबाटै सुरु गर्नुपर्ने बताउनुभयो। उहाँले आहार, विहार र विचारमा सुधार ल्याउनु नै मोटोपन नियन्त्रणको पहिलो आधार भएको उल्लेख गर्नुभयो।
