गोरखाका दुई स्वास्थ्यकेन्द्रमा स्वास्थ्य सामग्री हस्तान्तरण

गोरखा ।  सम्भव नेपालका संस्थापक अध्यक्ष प्रेमकुमार खत्रीको सयोजनमा गोरखाका दुई पालिकाका स्वास्थ्य केन्द्रमा सुविधासम्पन्न प्रयोगशालाका लागि आवस्यक सामग्री प्रदान गरिएको छ । खत्रीको पहलमा गोरखा नगरपालिका २ को कोखेआहाले शहरी स्वास्थ्य केन्द्र र भिमसेन थापा गाउँपालिका ६ अश्राङस्थित शहिदस्मृति आधारभूत अस्पतालमा सुविधा सम्पन्न प्रयोगशालाका लागि अत्याधुकि सामग्री प्रदान गरिएको हो ।

नागरिकलाई गाउँघरमै गुणस्तरीय स्वास्थ्य सेवा उपलब्ध गराउने उद्देश्यले दुई पालिकाका स्वास्थ्य केन्द्रमा करिब ८० लाख रुपैयाँ बराबरका आधुनिक स्वास्थ्य उपकरणहरू हस्तान्तरण गरिएको कार्यक्रम ब्यवस्थापक उत्तम अधिकारीले बताउनु भयो ।

श्राङस्थित शहिदस्मृति आधारभूत अस्पताललाई अत्याधुनिक डिजिटल प्रविधिको एक्स–रे (डीआर सिस्टम), भिडिओ एक्स–रे मेसिन, ईसीजी मेसिन र फ्रिज लगायतका सामग्रीहरू प्रदान गरिएको छ । यसैगरी, गोरखा नगरपालिका–२, ताप्लेस्थित कोखेआहाले शहरी स्वास्थ्य केन्द्रमा व्यवस्थित प्रयोगशाला स्थापनाका लागि आइएलआर मेसिन, यूएसजी मेसिन, इलेक्ट्रिक एनालाइजर र माइक्रोस्कोप लगायतका उपकरणहरू उपलब्ध गराइएको हो । यी उपकरणसँगै अब त्यस क्षेत्रका बासिन्दाले सामान्य स्वास्थ्य परीक्षण र रिपोर्टका लागि सदरमुकाम वा चितवन र काठमाडौं धाउनुपर्ने बाध्यता हट्ने विश्वास गरिएको छ ।

बुधबार एक कार्यक्रममावीच सम्भव नेपालका अध्यक्ष खत्रीले सो सामग्री स्थानीय तह र स्वास्थ्य चौकीलाई हस्तान्तरण गर्नुभएको हो । जसमा कोखेआहालेको कार्यक्रमा गोरखा नगरपालिका मेयर कृष्णबहादुर राना, उपमेयर सपना पुन, वडाध्यक्ष रहमतुल्ला मियाँ लगायतको सहभागिता रहेको थियो । त्यस्तै अश्राङमा भिमसेनथापा गाउँपालिकाका अध्यक्ष लोकप्रसाद वञ्जारा, उपाध्यक्ष अमृता वस्ती लगायतको उपस्थिती रहेको थियो । प्रयोगशाला स्थापनाका लागि सम्भव नेपालबाट प्राप्त आधुनिक र सुविधा सम्पन्न उपकरण, औजारहरुको सदुपयोग गरि छिट्टै सेवा सञ्चालन गरिने पालिका प्रमुखहरुले प्रतिवद्धता जनाउनु भएको थियो ।