स्वास्थ्य सेवामा आधुनिकीकरण र पहुँचयोग्यताबारे छलफलसहित चितवनमा ‘एनेमेकन–२०२६’ सुरु

भरतपुर । नेपाल चिकित्सक संघद्वारा आयोजित ३०औँ ‘एनेमेकन–२०२६’ तथा पाँचौँ नेशनल हेल्थ समिट चितवनको मेडिकल सिटी भरतपुरस्थित बी.पी. कोइराला मेमोरियल क्यान्सर अस्पतालको सभाहलमा सुरु भएको छ। ‘आधुनिक, सुलभ र समान स्वास्थ्य सेवामार्फत प्राथमिक स्वास्थ्य सेवा सुदृढीकरण’ भन्ने मूल नारासहित आयोजित दुईदिने सम्मेलनमा नेपाल, चीन र भारतसहितका विशेषज्ञ चिकित्सक, स्वास्थ्यकर्मी र अनुसन्धानकर्ता तथा स्वास्थ्य क्षेत्रका नीतिनिर्माताहरूको सहभागिता रहेको छ।

नेपाल चिकित्सक संघका अध्यक्ष डा. अनिलविक्रम कार्कीका अनुसार सम्मेलनले नेपालको स्वास्थ्य क्षेत्रमा देखिएका पहुँच, गुणस्तर सम्बन्धी चुनौतीहरूको समाधानका लागि नवप्रवर्तनमा केन्द्रित बहसलाई अघि बढाउने लक्ष्य राखेको छ। सम्मेलनमा विश्व स्वास्थ्य संगठन (डब्लुएचओ), संघीय स्वास्थ्य मन्त्रालय, बागमती प्रदेश स्वास्थ्य मन्त्रालय, स्थानीय तह लगायत विभिन्न सरकारी तथा गैरसरकारी निकायका प्रतिनिधिहरूको पनि सहभागिता रहेको छ।

सम्मेलनको पहिलो दिन राष्ट्रिय स्वास्थ्य शिखर सम्मेलनअन्तर्गत ‘एनएचएस–४ घोषणापत्रको समीक्षा’, ‘एआई, डिजिटल स्वास्थ्य तथा नवप्रवर्तन’, ‘एन्टिमाइक्रोबियल प्रतिरोध : मौन महामारी’ तथा ‘स्वास्थ्यकर्मीका मेडिको–लिगल समस्या र बर्नआउट’ विषयमा चारवटा विशेष प्यानल छलफल आयोजना गरिएको छ।

त्यसैगरी वैज्ञानिक सत्रअन्तर्गत क्यान्सर उपचार, आपत्कालीन अवस्थामा अल्ट्रासाउन्ड तथा इकोको प्रयोग, नेपालमा आणविक चिकित्सा, मेटाबोलिक सिन्ड्रोम, रक्तसम्बन्धी रोग, मिर्गौला रोग, मानसिक स्वास्थ्य, योग तथा ध्यान, ल्याप्रोस्कोपिक शल्यक्रिया, बाँझोपन सेवा, ट्रमा तथा आकस्मिक सेवा, प्रतिरक्षा विज्ञान तथा मातृ मृत्युदर न्यूनीकरणलगायत विषयमा वैज्ञानिक प्रस्तुतीकरण भएका छन्।

कार्यक्रम संयोजक डा. महेन्द्र अग्रहरीका अनुसार सम्मेलनमा तीनवटा सभाकक्षमा एकसाथ प्यानल छलफल, कार्यपत्र प्रस्तुतीकरण तथा रोगसम्बन्धी अनुसन्धानका नतिजाहरू प्रस्तुत भइरहेका छन्। देशभरबाट करिब ३८० जना सहभागी रहेको सम्मेलनमा प्राथमिक स्वास्थ्य सेवा सुधार, डिजिटल हेल्थ, ग्रामीण क्षेत्रमा स्वास्थ्य सेवाको पहुँच, स्वास्थ्य बीमा, स्वास्थ्य जनशक्ति व्यवस्थापन तथा आधुनिक प्रविधिको प्रयोगजस्ता विषयमा विशेष सत्रहरू सञ्चालन गरिएको छ।

भोलि आइतबार हुने औपचारिक उद्घाटन समारोहमा नेपाल चिकित्सक संघको नवनिर्वाचित कार्यसमितिलाई पद हस्तान्तरण गरिनेछ। त्यसपछि बाँकी वैज्ञानिक शोधपत्रहरू प्रस्तुत तथा छलफल गरिनेबारे डा. शंकर लौडारीले जानकारी दिनुभयो ।