चितवन । भरतपुरस्थित नेशनल सिटी अस्पताल लिमिटेडले संक्रमण रोकथाम तथा नियन्त्रण सम्बन्धी तीनदिने तालिम सम्पन्न गरेको छ । संक्रमण रोकथाम तथा नियन्त्रण कार्यलाई थप प्रभावकारी बनाउने उद्देश्यले आयोजना गरिएको उक्त तालिम शुक्रबारदेखि आइतबारसम्म सञ्चालन गरिएको थियो ।
अस्पताल परिसरमा आयोजित तालिममा प्रशिक्षकहरू विष्णु कुमारी श्रेष्ठ, कमला रेग्मी, गोमा राई तथा सुमित्रा पराजुलीले संक्रमण रोकथाम, स्वास्थ्य संस्थाभित्र अपनाउनुपर्ने सुरक्षा सतर्कता, सरसफाइ व्यवस्थापन, व्यक्तिगत सुरक्षा सामग्रीको सही प्रयोग तथा बिरामी र स्वास्थ्यकर्मीको सुरक्षासम्बन्धी विषयमा सहजीकरण गर्नुभएको थियो । तालिममा सहभागी स्वास्थ्यकर्मीहरूले यसबाट आफ्नो पेशागत कार्यका लागि थप व्यावहारिक ज्ञान हासिल भएको बताउँदै यसले आफू तथा बिरामीको उपचार र हेरचाहको गुणस्तर अभिवृद्धिमा सहयोग पुग्ने विश्वास व्यक्त गर्नुभएको थियो ।
तालिम समापन कार्यक्रममा बोल्दै अस्पतालका प्रबन्ध निर्देशक विक्रम अधिकारीले तालिमबाट प्राप्त ज्ञान र सीपलाई व्यवहारमा उतार्न आग्रह गर्नुभएको थियो । उहाँले यसबाट कार्यक्षमता अभिवृद्धि हुनुका साथै सुरक्षित कार्यशैलीको विकास हुने भएकाले स्वास्थ्यकर्मीहरूले आफू र बिरामीप्रति संवेदनशील भई सेवा प्रवाह गर्नुपर्नेमा जोड दिनुभयो । समापन समारोहमा अस्पतालका अध्यक्ष प्रचण्ड लाल प्रधान र वरिष्ठ मिर्गौला रोग विशेषज्ञ डा. निर्मल लामिछानेको उपस्थिति रहेको थियो ।
