दर्ता भएका तर नवीकरण नगरेका ५ हजार ३०२ वटा औषधी पसलको दर्ता खारेजी

काठमाडौँ । औषधी व्यवस्था विभागले दर्ता भएका तर नवीकरण नगरेका ५ हजार ३०२ वटा औषधी पसलको दर्ता खारेजी गरेको छ । विभागले नवीकरण म्याद समाप्त भएका औषधी पसलहरुको प्रमाणपत्र स्वत रद्द भएको भन्दै ५ हजार ३०२ वटा पसलको सूची सार्वजनिक गरेको छ ।

औषधी ऐन २०३५ को दफा ११ मा भएको संसोधित व्यवस्था बमोजिम औषधी उत्पादन अनुज्ञा पत्र, सिफारिस पत्र तथा प्रमाणपत्रको अवधी, नबीकरण तथा सो सम्वन्धी अन्य व्यवस्था लागू गरिएको भन्दै विभागले उक्त ऐनको दफा ११ को (५) बमोजिम औषधी पसलहरुको नवीकरण नगरिएका पसलहरुको दर्ता स्वत रद्द भएको स्पष्ट पारेको छ ।

विभागले अन्य औषधी पसलका सञ्चालकहरुलाई आफ्नो प्रमाणपत्रको अवस्था यकिन गरी आवश्यक प्रक्रिया पुरा गर्न तथा औषधी बिक्री बितरण कार्य सञ्चालन गर्दा प्रचलित कानूनी व्यवस्था मिलाउन समेत अनुरोध गरेको छ । विभागमा दर्ता भएका औषधी पसलको संख्या २६ हजार थियो ।

‘पहिले म्याद समाप्त भएको ३५ दिन भित्र नवीकरण गर्नु पर्ने र त्यसपछिको ३ महिनासम्ममा २५ प्रतिशत विलम्ब शुल्क तिरेर नवीकरण गर्न सकिने व्यवस्था थियो । तर अहिले संसोधित व्यवस्थामा म्याद समाप्त हुनु अगावै नै नवीकरण गरिसक्नु पर्ने र नगरे स्वत रद्द हुने व्यवस्था छ । रद्द भएको जानकारी सार्वजनिक सूचनामार्फत गराउने भन्ने व्यवस्था छ । त्यसैले आज सूचना प्रकाशित गरेका हौँ,’ विभागका प्रवक्ता एवं बरिष्ठ औषधी व्यवस्थापक किरणसुन्दर बज्राचार्यले भने ।