काठमाडौं । चर्चित कलाकार एवं निर्देशक दीपाश्री निरौलाको ब्रेन ट्युमरको सफल शल्यक्रिया गरिएको छ। स्वास्थ्यमा समस्या देखिएपछि केही दिनअघि उनलाई माइतीघरस्थित अन्नपूर्ण न्यूरो अस्पतालमा भर्ना गरिएको थियो। अस्पतालका वरिष्ठ न्यूरो सर्जन डा. बसन्त पन्त नेतृत्वको चिकित्सक टोलीले उनको ट्युमरको शल्यक्रिया गरेको हो।
निरौलाको ब्रेन ट्युमरको सफल शल्यक्रियापछि अभिनेता तथा निर्माता दीपकराज गिरीले सामाजिक सञ्जालमार्फत स्वास्थ्य अवस्थाबारे जानकारी दिएका छन् । गिरीका अनुसार चलचित्रको छायांकन (सुटिङ) चलिरहेका बेला निरौलालाई ब्रेन ट्युमर भएको पत्ता लागेको थियो । त्यसपछि टोली केही समय अन्योलमा परेको र चिकित्सकको सल्लाहअनुसार तत्काल शल्यक्रिया गर्नुपर्ने अवस्था आएको उनले उल्लेख गरेका छन् ।
निरौलाको मस्तिष्कबाट निकालिएको ट्युमर कस्तो प्रकृतिको हो ? क्यान्सरयुक्त हो वा होइन ? भन्ने पत्ता लगाउन बायोप्सी परीक्षणका लागि पठाइएको छ। बायोप्सीको रिपोर्ट आउन बाँकी छ।
