काठमाडौं । राष्ट्रिय विभूति मुख्तियार जनरल भीमसेन थापाको २५२औँ जन्मजयन्तीको अवसरमा वरिष्ठ चिकित्सक प्राडा बुद्धिबहादुर थापालाई ‘राष्ट्रिय विभूति भीमसेन थापा स्मृति प्रतिभा सम्मान–२०८३’ अर्पण गरिएको छ । बगाले थापा क्षेत्री राष्ट्रिय फाउन्डेसन, नेपालको आयोजनामा आइतबार धरहरा परिसरस्थित भीमसेन स्तम्भमा सम्पन्न स्मृति सभामा नेपाली सेनाका प्रधानसेनापति अशोकराज सिग्देलले प्राडा थापा तथा साहित्यकार एवं गीतकार राजेन्द्र थापालाई उक्त सम्मान प्रदान गरे ।
प्राडा थापा नेपालको स्वास्थ्य क्षेत्रमा चार दशकभन्दा लामो योगदान पुर्याएका वरिष्ठ फिजिसियन हुन् । उनी पोखरा स्वास्थ्य विज्ञान प्रतिष्ठानका संस्थापक उपकुलपतिका रूपमा पश्चिम नेपालमा चिकित्सा शिक्षा, विशेषज्ञ स्वास्थ्य सेवा, स्वास्थ्य अनुसन्धान तथा दक्ष जनशक्ति उत्पादनमा महत्वपूर्ण भूमिका निर्वाह गरेका व्यक्तित्वका रूपमा परिचित छन् । उनले मणिपाल शिक्षण अस्पताल लगायत विभिन्न संस्थामा चिकित्सक र प्राध्यापकका रूपमा सेवा दिँदै हजारौं चिकित्सकको उत्पादन तथा स्वास्थ्य सेवाको गुणस्तर सुधारमा योगदान पुर्याएका छन् । बिरामी–केन्द्रित ‘सोसियल मेडिसिन’ अवधारणालाई व्यवहारमा उतार्दै सामुदायिक स्वास्थ्य सेवामा पनि उनले उल्लेखनीय योगदान दिएका छन् ।
५६ जनाले गरे रक्तदान
कार्यक्रममा राष्ट्रिय विभूति भीमसेन थापाको स्मृतिमा आयोजित रक्तदान कार्यक्रममा ५६ जनाले रक्तदान गरेका थिए । फाउन्डेसनका अध्यक्ष डा. राम थापा क्षेत्रीले भीमसेन थापाले नेपालको राष्ट्रिय अस्तित्व, स्वाधीनता र सार्वभौमिकताको संरक्षणमा अतुलनीय योगदान पुर्याएको उल्लेख गर्दै उनको देशभक्ति, इमानदारी र नैतिकता आज पनि नयाँ पुस्ताका लागि प्रेरणाको स्रोत रहेको बताए ।
उनले सुगौली सन्धिपछि नेपालको अस्तित्व जोगाउन भीमसेन थापाको नेतृत्व तथा नालापानी, सिन्धुलीगढी र किल्ला–काँगडालगायतका ऐतिहासिक युद्धमा नेपाली वीरहरूको बलिदान निर्णायक रहेको स्मरण गर्दै राष्ट्रहितका कार्यमा सबै एकजुट हुनुपर्नेमा जोड दिए ।
