भद्रपुर । अर्जुनधारा–९ स्थित शनिश्चरे नगर अस्पतालस्थित निःशुल्क आमा तथा नवजात शिशु सुरक्षा कार्यक्रम प्रभावकारी बनिरहेको पाइएको छ । गुणस्तरीय सेवा, दक्ष चिकित्सक, निःशुल्क शल्यक्रिया तथा एम्बुलेन्स सुविधाका कारण अस्पतालमा सुत्केरी गराउनेको सङ्ख्या बढिरहेको अस्पतालले जनाएको छ । विसं २०७७ देखि नगर अस्पतालका रूपमा सेवा सुरु गरेको उक्त अस्पतालले विसं २०८१ असार २० गतेदेखि नेपाल सरकारको आमा तथा नवजात शिशु सुरक्षा कार्यक्रम सञ्चालनमा ल्याएको थियो ।
अस्पताल प्रशासन शाखा प्रमुख राजविक्रम खड्काका अनुसार, कार्यक्रम सुरु भएयता हालसम्म ५५५ जनाले सुरक्षित प्रसूति सेवा लिएका छन् । तीमध्ये २२४ जनाको शल्यक्रियामार्फत र बाँकीको सामान्य प्रसूति भएको अस्पतालको तथ्याङ्क छ । गत आर्थिक वर्ष २०८२/८३ मा मात्रै २६० जना गर्भवतीले सेवा लिएका छन् । तीमध्ये यस जनाको शल्यक्रियामार्फत तथा १६० जनाको सामान्य प्रसूति भएको शाखा प्रमुख खड्काले जानकारी दिनुभयो । “गर्भवतीलाई नियमित गर्भ जाँचदेखि निःशुल्क प्रसूति, आवश्यक परे शल्यक्रिया, औषधि, परामर्श र एम्बुलेन्ससम्मको सुविधा उपलब्ध गराउँदै आएका छौँ ।
गुणस्तरीय सेवा पाएपछि सेवाग्राहीको विश्वास बढ्दै गएको छ”, खड्काले भन्नुभयो । अस्पतालमा वरिष्ठ स्त्री तथा प्रसूति रोग विशेषज्ञ डा दिप्ती कुँवरको नेतृत्वमा प्रसूति सेवा सञ्चालन भइरहेको छ । अस्पतालले सुत्केरी हुन आउनेका लागि आउँदा वा फर्कदा एकपटक निःशुल्क एम्बुलेन्स सेवासमेत उपलब्ध गराउँदै आएको जनाएको छ । अर्जुनधारा नगरपालिकासँगै मेचीनगर, बिर्तामोड, कन्काई नगरपालिका, बुद्धशान्ति गाउँपालिका तथा इलामका सूर्योदय, माई नगरपालिका र रोङ गाउँपालिकाबाट गर्भवती सेवा लिन आउने गरेका अस्पतालले जनाएको छ । उक्त नगर अस्पतालको सेवा क्षेत्र विस्तार हुँदै गएको देखिएको छ ।
अर्जुनधारा नगरपालिकाका प्रमुख बलदेवसिंह गोम्देनले नगरस्तरबाट निःशुल्क सुत्केरी सेवा प्रभावकारी रूपमा सञ्चालन गर्ने अभियान देशमै नमूना बनेको दाबी गर्नुभयो । उहाँले भन्नुभयो, “नगरपालिकाको अस्पतालबाट विशेषज्ञसहित गुणस्तरीय र निःशुल्क सुत्केरी सेवा दिन सकिन्छ भन्ने उदाहरण हामीले प्रस्तुत गरेका छौँ । दक्ष जनशक्ति, पर्याप्त पूर्वाधार र निःशुल्क सेवाका कारण सेवाग्राहीको विश्वास बढ्दै गएको छ ।” १५ शय्याको स्वीकृति प्राप्त शनिश्चरे नगर अस्पतालले हाल ६० शय्यासम्म सेवा विस्तार गर्दै आएको छ । अस्पतालका मेडिकल सुपरिटेन्डेन्ट डा.योगेश चेम्जोङका अनुसार हाल अस्पतालबाट दैनिक ५०० भन्दा बढी बिरामीले स्वास्थ्य सेवा लिने गरेका छन् ।
अस्पतालले स्थानीय नागरिकको मागलाई मध्यनजर गर्दै आगामी दिनमा दन्त सेवा, फिजियोथेरापी सेवा तथा ल्याप्रोस्कोपिक शल्यक्रिया सेवासमेत सञ्चालन गर्ने तयारी गरेको छ । अस्पतालले गुणस्तर सुधारमा उल्लेखनीय उपलब्धि हासिल गरेको छ । आर्थिक वर्ष २०८२/८३ को न्यूनतम सेवा मापदण्ड मूल्याङ्कनमा ८१ अङ्कसहित जिल्लामा सर्वोत्कृष्ट बन्न सफल भएको अस्पतालले जनाएको छ।रासस
