हेटौँडा । हेटौँडा अस्पतालमा नवजात शिशु सघन उपचार कक्ष (एनआइसियु) र बाल सघन उपचार कक्ष (पिआइसियु) सञ्चालनमा आएको छ । एनआइसियु र पिआइसियु सञ्चालनमा आएको तीन सातामा २८ जना बालबालिका लाभान्वित भएका छन् ।
साउन २६ गतेबाट सञ्चालनमा आएको एनआइसियुमा १५ नवजात शिशु र पिआइसियुमा १३ जना बालबालिकाको उपचार गरिएको हेटौँडा अस्पतालका प्रवक्ता उत्सव चौलागाईले जानकारी दिनुभयो । यि दुइ कक्षमा ५/५ गरी कुल १० वटा शैय्या छन् । आइतबार पनि यि दुवै कक्षमा ४/४ जना जना बालबालिका उपचाररत रहेको अस्पतालले जनाएको छ । एनआइसियु तथा पिआइसियुमा भर्ना भएका शिशु वा बालबालिकालाई ७ दिनदेखि १० दिनसम्म स्वास्थ्यकर्मीको प्रत्यक्ष निगरानीमा उपचार गर्ने गरिएको अस्पतालले जनाएको छ ।
जन्मनेबित्तिकैका नवजात शिशुहरुमा विभिन्न समस्या आएमा वा समय नपुगी धेरै अघि जन्मेका, बच्चा जन्मने बित्तिकै नरोएमा, बच्चाले पेटभित्रै दिसा खाएमा, सास फेर्न असहज भएमा, आमाको दुध तान्न नसकेमा एनआइसियुमा राखेर २४ सै घन्टा स्वास्थ्यकर्मीको प्रत्यक्ष निगरानीमा उपचार गरिन्छ । यस्तै १ महिनादेखि १४ वर्ष सम्मका बालबालिकाहरुमा विषालु वस्तु सेवन गरेमा, सर्पको टोकाइ भएका, मेनेन्जाइटिस भएमा तथा गम्भीर बिरामी परेका वा चोटपटक लागेका जस्ता समस्या आएमा पिआइसियुमा उपचार गरिन्छ ।
