बीरगंज । वीरगंजका अस्पतालहरूमा रगतको अभाव भएसँगै बिरामीहरूको उपचारमा समस्या भइरहेको अवस्थामा आज बीरगंजमा आयोजित छुट्टाछुट्टै दुई कार्यक्रममा १ सय ६२ जनाले रक्तदान गरेका छन् ।
क्रियाशील युवा पत्रकार मञ्च नेपालको आयोजनामा सम्पन्न रक्तदान कार्यक्रममा १ सय १ जनाले रक्तदान गरेका छन् भने आर.पि. फाउण्डेशनद्वारा आयोजित कार्यक्रममा ६१ जनाले रक्तदान गरेका छन् ।
क्रियाशील युवा पत्रकार मञ्चले वीरगंजको घण्टाघरमा आयोजित रक्तदान कार्यक्रममा प्रिति त्रिपाठी, सुनिता पाण्डे, राकेश साह, आनन्द पटेल उपेन्द्र बरैई, दिपेश ठाकुर लगायतकाले रक्तदान गरेको संस्थाका उपाध्यक्ष आनन्द पटेलले जानकारी दिनुभयो ।
कार्यक्रम संयोजक निलम चौधरीको अध्यक्षतामा भएको कार्यक्रममा पर्साका प्रमुख जिल्ला अधिकारी उमेश कुमार ढकाल, शिक्षाविद् डा.दिपक शाक्य, ओमप्रकाश सर्राफ, दिलिपराज कार्की, लगायतको सहभागिता रहेको थियो ।
त्यसैगरी आर.पि. फाउण्डेशनद्वारा वीरगंज महानगरपालिका वडा नम्बर १३ मा आयोजित रक्तदान कार्यक्रममा ६१ जनाले रक्तदान गरेका छन् ।
कार्यक्रमको वीरगंज महानगरपालिकाका निवर्तमान नगर प्रमुख विजय सरावगीले उद्घाटन गर्नु भएको थियो ।
आर.पी फाउण्डेशनका अध्यक्ष प्रतीक्षा अधिकारीको अध्यक्षतामा सम्पन्न कार्यक्रममा वीरगंज महानगरपालिका वडा नम्बर १३ का अध्यक्ष हिरालाल गिरी लगायतको उपस्थिति रहेको थियो । कार्यक्रमको सहजीकरण आनन्द उपाध्यायले गर्नु भएको थियो ।
