दाङको राप्ती गाउँपालिकाको एम्बुलेन्स बिग्रिएर दश महिना देखि थन्कियो

दाङ। दाङको राप्ती गाउँपालिका वडा नम्बर ५ मा रहेको सिसहनियाँ स्वास्थ्य चौकी मार्फत् सञ्चालन हुँदै आएको एम्बुलेन्स बिग्रिएर थन्कीएको दश महिना भयो । यसको मारमा स्थानीय सुत्केरी हुने महिला तथा अन्य बिरामीहरू मारमा परेका छन् ।

एम्बुलेन्स बिग्रीएको १० महिना पुग्दा समेत सरोकारवालाले चासो दिएका छैनन् । बिग्रीएको एम्बुलेन्स मर्मत तथा सञ्चालन गर्न धेरै खर्च लाग्ने भएपछि स्वास्थ्य चौकी प्रशासनले चासो दिएको छैन । विभिन्न समयमा एम्बुलेन्स दुर्घटना हुँदा मर्मत नहुँदा हाललाई थन्काउन परेको सिसहनिया स्वास्थ्य चौकी प्रमुख धनबहादुर खड्काले जानकारी दिनुभयो ।

यस विषयमा जानकारी लिन खोज्दा राप्ती गाउँपालिका स्वास्थ्य शाखा प्रमुख नारायण राउतले नेपाल सरकारको नयाँ नीति अनुसार स्वास्थ्य चौकीले नयाँ एम्बुलेन्स खरिद गर्न नपाउने र मर्मत खर्च धेरै हुने भएकोले समस्या समाधान गर्न नसकेको बताउनुभयो । थोरै खर्चमा मर्मत गरेर चलाउन मिल्ने भए यही महिनाभित्रै सञ्चालन ल्याउनका लागि प्रयास गर्ने प्रमुख रावतले जानकारी दिनुभयो ।