नर्भिकमा इन्डोस्कोपीमा वीथ ‘र्‍याट तुथ टुल्स’ को प्रयोग : आमाशयमा पुगेको चम्चा निकालियो

काठमाडौं । काठमाडौं थापाथलीस्थित नर्भिक अस्पतालका चिकित्सकले शल्यक्रिया नगरी आमाशयमा अड्किएको चम्चा निकालेका छन् ।

नर्भिक अस्पतालका पाचन रोग विशेषज्ञ तथा पाचन रोग केन्द्रका प्रमुख डा. सन्दीपराज कुँवर नेतृत्वको टिमले आइतवार काठमाडौंकी १७ वर्षीया किशोरीको पेटमा अड्किएको चम्चा निकालेको हो । उक्त टिमले ४५ मिनेटको प्रयासमा इन्डोसकपी गरी पेटबाट चम्चा निकालेको अस्पतालले बताएको छ ।

उपचारमा संलग्न डा. कुँवरले नेपालमा शल्यक्रिया नगरी आमाशयबाट सुरक्षित ढंगले चम्चा निकालेको घटना पहिलो भएको दाबी गरे ।

‘साइकेट्रिक इलनेश टाइपको बिरामीले पानी खाने क्रममा झुक्किएर चम्चा निलेको बताउनुभयो । तर, यस्तो बिरामीहरूलाई वाकवाक गरिरहन पर्ने र वाकवाकी गराउनका लागि चम्चा घाँटीतिर हाल्दा झुक्किएर निलेको देखिन्छ,’ डा. कुँवरले भने, ‘आमाशयमा गएर चम्चा अड्किएको रहेछ । आन्द्रातिर जान नपाएको अवस्थामा हामीले सुरक्षित ढंगले चम्चा निकालेका हौं ।’

डा. कुँवर नेतृत्वको टिमले यसअघि विभिन्न व्यक्तिको पेटबाट सिक्का, पिन र हड्डीसमेत शल्यक्रिया नगरी निकाल्दै आएको छ ।

डा. कुँवरका अनुसार चम्चा सानो आन्द्राको मुखमा पुगेर अड्केर बसेको थियो । छड्के परेर बसेको हुनाले शल्यक्रिया गरेर निकाल्न सहज थिएन, इन्डोस्कोपीमा वीथ ‘र्‍याट तुथ टुल्स’ प्रयोग गरेर बिना चिरफार किशोरीको पेटमा भएको चम्चा निकालियो । यो औजारको तिखो टुप्पोको प्रयोगले पेटको भित्री भागमा केही अड्किएको भए इन्डोस्कोपी गरी निकाल्न सकिन्छ ।

आइतवार उपचारका लागि ल्याइएकी बिरामीलाई रातभर अब्जरभेसनमा राखेर अवस्था सामान्य देखिएपछि सोमवार बिहान डिस्चार्ज गरिएको अस्पतालले बताएको छ ।