टीकापुर । कैलालीको टीकापुर अस्पतालमा जनरल सर्जरी सेवा सुरुआत भएको छ । सुविधा सम्पन्न अस्पताल भएर पनि विशेषज्ञ नहुँदा बिरामी समस्यामा पर्दै आएका थिए । जनरल सर्जन डा नवीनचन्द्र भट्टले अस्पतालमा हालै आफ्नो सेवा सुरु गर्नु भएको हो ।
यसअघि वीर अस्पताल काठमाडौँमा कार्यरत डा भट्टको सरुवा भई हाल टीकापुर अस्पताल आउनुभएको हो । उहाँले अब अस्पतालबाट जनरल एण्ड जीआई सर्जरीको सबै सेवा थालनी हुने जानकारी दिनुभयो । “हाइड्रोसील, हर्निया, पत्थरी, पाइल्स, फिस्टुला, स्तनमा गाँठागुँठी, स्तन ट्युमर, छातीमा रगत तथा पानी भरिएको लगायत समस्याको शल्यक्रिया यही हुने”, उहाँले बताउनुभयो । डा. भट्टका अनुसार “केही दिनमै ‘मेसिन’ आएपछि ल्याप्रोस्कोपीको माध्यमबाट पनि शल्यक्रिया सुरु हुनेछ ।”
उहाँका अनुसार यो ल्याप्रोस्कोपीक शल्यक्रिया भनेको चिरफार नगरी मेसिनद्धारा सानो प्वाल पारी गरिने सर्जरी सेवा हो । डा भट्ट आएसँगै अस्पतालमा अब आठ विशेषज्ञ चिकित्सक भएका छन् । नौ चिकित्सकको दरबन्दी रहेको अस्पतालमा दुई सरकारी दरबन्दी र बाँकी छ जना स्थानीय तह तथा अन्य कोषबाट सुविधा प्राप्त गर्ने गरी काम गरिरहेका छन् ।
अस्पतालमा जनरल सर्जन, अर्थोपेडिक सर्जन, बालरोग बिशेषज्ञ, स्त्री तथा प्रसूति रोग, एनेष्थेसियोलोजिष्ठ र एमडिजीपी बिशेषज्ञहरु बाट बिरामीकाहरुको लागि सेवा उपलब्ध रहेको अस्पताल व्यवस्थापन समितिका अध्यक्ष झपटबहादुर सोडारीेले जानकारी दिनुभयो । यसपछि अस्पतालको गुरुयोजना बनाई अहिले ५१ शैया रहेको अस्पताल स्तरोन्नति गरी ५१ शैया थप्ने तयारी भइरहेको पनि उहाँले बताउनुभयो । “हामी अस्पताल विकास सँगसँगै अस्पतालमा थप सेवा कसरी विस्तार गर्ने भनी क्रियाशील छौँ, अस्पतालको स्तरोन्नति सँगै गुरुयोजना निर्माण गर्ने तयारी छ”, उहाँले भन्नुभयो, “अस्पतालमा भएका भवन, उपकरण पनि सदुपयोग गर्ने गरी काम गर्दैछौँ ।”
अस्पतालमा दैनिक ५०० जना बिरामीले उपचार सेवा लिने गरेका छन् । यहाँ कैलाली जिल्लाको टीकापुर, लम्की, भजनी नगरपालिका, जानकी, जोशीपुर गाउँपालिका सहित बर्दिया जिल्लाको राजापुरका मानिस पनि उपचार सेवा लिन आउने गरेका छन् । यहाँ स्वास्थ्य बीमा कार्यक्रम समेत लागू भएकाले सेवा लिनेको संख्या बढ्दै गएको छ । यहाँका पालिकाका नागरिकले सेवा पाउने भएकाले अस्पतालमा विशेषज्ञ चिकित्सक र अन्य सेवा विस्तारका लागि टीकापुर , भजनी नगरपालिका र जानकी गाउँपालिकाले सघाउँदै आएका छन् । रासस
