चुनाव लडेका ८ स्वास्थ्यमन्त्रीमा ६ जना पराजित

काठमाडौं । यसपटकको निर्वाचनमा प्रतिनिधिसभा सदस्यका लागि २०७४ यताका पूर्वस्वास्थ्यमन्त्रीहरु पद्मा अर्याल (राज्यमन्त्री), उपेन्द्र यादव, भानुभक्त ढकाल, हृदयेश त्रिपाठी, उमेश श्रेष्ठ (राज्यमन्त्री), शेरबहादुर तामाङ, कृष्णगोपाल श्रेष्ठ र विरोध खतिवडा यसपटकको प्रतिनिधिसभा निर्वाचनमा उमेदवार बनेका थिए । यीमध्ये उमेश श्रेष्ठ बाहेक सबै निवर्तमान सांसद हुन्, अर्थात उनीहरु दोहोरिएर संसद् छिर्ने दौडमा थिए ।

तर, यसपटकको निर्वाचनबाट सांसदका लागि पूर्वस्वास्थ्यमन्त्रीहरुमध्ये ६ जनाको दौडमा पाँच वर्षका लागि ब्रेक लागेको छ । १९ दिन स्वास्थ्यमन्त्री बनेका नेकपा (एमाले)का कृष्णगोपाल श्रेष्ठ विजयी भएका छन् । श्रेष्ठ काठमाडौं क्षेत्र नम्बर ९ बाट राष्ट्रिय स्वतन्त्र पार्टीका टेकबहादुर पोखरेलभन्दा ९९५ मत बढी ल्याएर विजयी भएका हुन् ।

यता २०७४ को निर्वाचनपछि राज्यमन्त्रीको रुपमा पहिलोपटक स्वास्थ्य मन्त्रालय सम्हाल्ने जिम्मेवारी पाएकी एमाले सचिव पद्माकुमारी अर्याल स्याङ्जा क्षेत्र नम्बर २ बाट प्रतिस्पर्धामा छिन् । हालसम्म मतगणना सुरु नभएको सो क्षेत्रमा उनी कांग्रेस उपसभापति धनराज गुरुङसहित ११ जनासँग प्रतिस्पर्धामा छिन् । यी दुईबाहेक अन्य पूर्वस्वास्थ्यमन्त्री पराजित भइसकेका छन् ।

२०७४ को निर्वाचनपछि उपप्रधान तथा स्वास्थ्यमन्त्री बनेका जनता समाजवादी पार्टीका अध्यक्ष उपेन्द्र यादव यसपटक सप्तरी क्षेत्र नम्बर २ मा जनमत पार्टीका अध्यक्ष सीके राउतसँग पराजित भए । करिब १८ महिना स्वास्थ्यमन्त्रीको जिम्मेवारी सम्हालेका यादव राउतभन्दा १८ हजार ६३ मत कम ल्याउँदै पराजित भएका हुन् ।
०७७ पुसपछि पाँच महिना स्वास्थ्यमन्त्रीको जिम्मेवारीमा रहेका हृदयेश त्रिपाठी यसपटक पराजित भए । कोरोना संक्रमण तीव्र हुँदै गएको समयमा महत्वपूर्ण मन्त्रालय सम्हालेका त्रिपाठी नवलपरासी पश्चिम क्षेत्र नम्बर १ मा नेपाली कांग्रेसका विनोदकुमार चौधरीसँग ६ हजारभन्दा बढी मतान्तरले पराजित भएका हुन् ।

कोरोनाकालमा नै १९ दिन स्वास्थ्यमन्त्रीको जिम्मेवारी पाएका शेरबहादुर तामाङ पनि यसपटकको प्रतिनिधिसभा निर्वाचनमा पराजित भए । नेकपा (एमाले)बाट सिन्धुपाल्चोक क्षेत्र नम्बर २ मा लडेका उनी कांग्रेसका मोहनबहादुर बस्नेतसँग १२ हजारभन्दा बढी मताान्तरले पराजित भएका हुन् ।

सांसदभन्दा बाहिरबाट स्वास्थ्य राज्यमन्त्री बनाइएका नेपाली कांग्रेसका उमेश श्रेष्ठ चितवन क्षेत्र नम्बर २ बाट पराजित भएका छन् । राष्ट्रिय स्वतन्त्र पार्टीका अध्यक्ष रवि लामिछानेसँग उनी ३४ हजार १७० मतान्तरका साथ पराजित भए ।

कोरोनाकालमा सबैभन्दा लामो समय अर्थात नौ महिना स्वास्थ्यमन्त्रीको जिम्मेवारी सम्हालेका नेकपा (एकीकृत समाजवादी)का सचिव विरोध खतिवडा मकवानपुर क्षेत्र नम्बर २ बाट पराजित भए । सो क्षेत्रमा उनी आफ्नै राजनीतिक चेला रहेका एमालेका युवा नेता महेश बर्तौलासँग चार हजार ५२० मतान्तरले पराजित भएका हुन् । राजनितिक यात्राको ३० वर्षपछि मन्त्री बन्ने अवसर पाएका खतिवडाका लागि अब भने संसद्को ढोका पाँच वर्षका लागि बन्द भएको छ ।
त्यस्तै, कोरोनाकाल सुरुआतमा एक वर्षभन्दा बढी स्वास्थ्यमन्त्रीको कार्यभार सम्हालेका एमालेका भानुभक्त ढकाल यसपटक मोरङ क्षेत्र नम्बर ३ बाट पराजित भएका छन् । सो क्षेत्रमा नेपाली कांग्रेसका सुनिल शर्मा उनीभन्दा झन्डै दोब्बर मतले विजयी हुँदा ढकालको संसद् छिर्ने यात्रा पाँच वर्षका लागि टुंगिएको छ ।