सिएमसी अस्पतालमा नवजात शिशुको जटिल शल्यक्रिया शुरु

बागमती श्रेष्ठ , चितवन । नवजात शिशुका शल्यक्रियाको लागि काठमाडौंँ लैजानुपर्ने बाध्यता हटेको छ । चितवन मेडिकल कलेजले बाल्य शल्यक्रिया सम्बन्धी सबै सेवा सुरु गरेपछि चितवनका बिरामीलाई काठमाडौँ लैजानुपर्ने बाध्यता हटेको हो । आज अस्पतालमा पत्रकार सम्मेलन गरी यसबारे जानकारी दिईएको हो ।

अस्पतालमा हाल बालबालिकामा प्राय देखिरहेको हर्निया, हाइड्रोसिल, एपेन्डीसाइटिस जस्ता समस्याहरुको दैनिक शल्यक्रिया भइरहेको छ । पेटमा आन्द्रा खप्टेको अवस्थामा समयमै अस्पताल आएको खण्डमा विना अप्रेशन पानीको माध्यमबाट आन्द्रा खुलाई उपचार गराउन सकिने सेवा समेत अस्पतालले दिदै आइरहेको छ ।

हालसम्म यस्तो सेवा ३१ जना बालबालिकाहरुले लिइसकेको अस्पतालका बाल शल्य चिकित्सक डाक्टर प्रकृति गिरीले जानकारी दिइन् । नेपालमा दक्ष बाल शल्य चिकित्सकको संख्या निकै न्यूनमा रहेको छ । यो विज्ञ सेवा काठमाडौँका केही अस्पतालमा मात्र उपलब्ध छ । उपत्यका बाहिर नियमित रुपमा चितवन मेडिकल कलेजले मात्रै यो सेवा दिइरहेको छ । हाल चितवनसंगै मकवानपुर, नवलपरासी, नवलपुर, गोरखा, लमजुङ, तनहुँ, रुपन्देही, सुनसरी, बारा, पर्सा, धनुषालगायत जिल्लाबाट बिरामीहरु उपचारका लागि चितवन मेडिकल कलेजमा आउने गरेका उनले जानकारी दिंँदै । हाल डा.गिरीको नेतृत्वमा बाल शल्यक्रियाका सबै सेवा प्रदान गरिदै आइएको छ ।

पोखराको मणिपाल शिक्षण अस्पतालबाट एमबीबीएस पास गरेर भारतको विश्वविख्यात जिपमेर अर्थात जवाहरलाल इन्स्टिच्युट पोन्डीचेरीमा गोल्डमेडल प्राप्त गरेकी डा।गिरीले भारतकै मौलाना आजाद मेडिकलबाट थप ३ वर्ष बाल शल्यक्रियामा खटिएकी थिइन् । काठमाडौंको कान्ती बाल अस्पतालमा केही समय सेवा गर्दागर्दै डा।गिरी चितवन मेडिकल कलेजमा आएकी हुन् । चितवन मेडिकल कलेजमा पछिल्लो १० महिनामा १ हजार २० जना बिरामीले ओपीडीबाट सेवा लिइसकेका छन् ।

हालसम्म १५ जना नवजात शिशु, १ वर्षमुनीका ३५ जना, १ देखि १४ वर्षमुनीका २५५ जना बिरामीको डा।गिरीको टिमले सफलतापूर्वक सर्जरी गरिसकेको छ । डा।गिरीको टिममा डा।प्रवेश ज्ञवाली, डा।विराज पराजुलीलगायत छन् । बालबालिकाहरुको शल्यक्रिया पश्चात सुविधासम्पन्न एनआइसीयू र पीआइसीयू सेवा पनि रहेको छ । यी सबै सेवा चितवन मेडिकल कलेजमा रहेको निर्देशक डा।दयाराम लम्सालले जानकारी दिए ।

अस्पतालले निकट भविष्यमै अन्तर्राष्ट्रियस्तरको सम्मेलन गरी चितवनमा नै बाल शल्यक्रियाको एक प्रतिष्ठित सेन्टर बनाउने लक्ष्य लिएको छ । जन्मेदेखि १४ वर्षसम्मका नवजात शिशु तथा बालबालिकाहरुको अनेकौं प्रकारका समस्या देखा पर्न सक्छन् । बाल शल्यचिकित्सकले बालबालिकाको साना–साना अंग, तन्तु, नसाहरु बारेमा दक्षता, ज्ञान, तालिम हासिल गरेका हुन्छन् । बालबालिकाको शल्यक्रिया सानो भन्ने हुँदैन । जति सानो बच्चा भयो त्यति धेरै जटिल शल्यक्रिया हुन्छ ।

सोही अवस्थालाई मध्येनजर गर्दै चितवन मेडिकल कलेजमा दक्ष चिकित्सक मार्फत यो सेवा सुरु गरिएको अस्पतालका प्रमुख कार्यकारी अधिकृत प्रताप देवकोटाले बताए ।