राष्ट्रिय स्वास्थ्य दर्पण हेल्थ अवार्डबाट स्वास्थ्यकर्मी र पत्रकार सम्मानित

चितवन । राष्ट्रिय स्वास्थ्य दर्पण हेल्थ अवार्ड—२०७९ ( प्रदेश नम्बर १, मधेश प्रदेश र वाग्मती प्रदेश) बाट चिकित्सक, स्वास्थ्यकर्मी र पत्रकार सम्मानित भएका छन । आज भरतपुरमा भएको हेल्थ अवार्डबाट उनीहरुलाई सम्मानित गरिएको हो ।

स्वास्थ्य दर्पण मिडिया नेटवर्कको सातौं वार्षिकोत्सवको अवसरमा उनीहरुलाई सम्मान गरिएको नेटवर्ककका अध्यक्ष सन्दीपकुमार श्रेष्ठले जानकारी दिए । संस्थाको बार्षिकोत्सवमा पत्रकारिता एवं स्वास्थ्य क्षेत्रमा सेवा र योगदान दिने व्यत्तित्वहरुलाई प्रमुख अतिथि नेपाली कांँग्रेसका नेता डा शशांक कोइराला, नेपाल पत्रकार महासंघका अध्यक्ष विपुल पोख्रेल लगायतले सम्मानपत्रसहित उनीहरुलाई सम्मान गरेका थिए ।

कार्यक्रममा बोल्दै प्रमुख अतिथि डा कोइरालाले नेपालको स्वास्थ्य क्षेत्रको उल्लेखनीय विकास भएको बताए । ‘चाहे स्वास्थ्यकर्मीको उत्पादन होस या प्रविधिको प्रयोगमा होस उल्लेखनीय प्रगति भएको छ, उनले भने, स्वास्थ्यको गुणस्तरीयतालेनै मानिसको मृत्युदर घटेको छ भने आयुदर पनि बढेको छ ।’ स्वास्थ्यकर्मीहरु आर्थिक आर्जन भन्दा सेवामा केन्द्रित हुन उनले आग्रह गरे। ‘तपाईहरु ठूलो होइन असल हुन प्रेरित हुनुस । प्रयत्न गर्नुुुस, उनले भन,े तपाईहरुको मुल्यांकन राज्यले गर्छ । समाजले गर्नेछ ।’ पछिल्लो समय विषयगत पत्रकारिताको विकास हुदै गएको बताउंँदै उनले स्वास्थ्य दर्पणले देशभरका स्वास्थ्य सेवामा लागेका व्यक्तित्वहरुलाई सम्मान गर्दै आएकोमा प्रसंशा गरे ।

पत्रकार महासंघका अध्यक्ष पोख्रेलले पछिल्लो समय पत्रकारमाथि आक्रमण बढ्दै गएको बताए । उनले पत्रकारिता क्षेत्र चुनौति पेशा भएको भन्दै स्वास्थ्यपत्रकारिता थप चुनौति र संवेदनशील विषय पत्रकारिता भएको बताए । स्वस्थ समाज निर्माण गर्न स्वस्थ पत्रकारिता गर्नुपर्ने भन्दै पोख्रेलले यस्ता सम्मानले स्वास्थ्यकर्मी र पत्रकारितालाई उर्जा मिल्ने बताए । ‘यो सम्मानले तपाईहरुलाई आफ्नो काममा प्रेरित गर्ने अवसर दिएको छ उनले भने, राज्यले तपाईहरु सबैलाई सम्मान दिन नसेकपनि निजी मिडियाको यो कार्य प्रशंसनीय छ । ’

गण्डकी प्रदेशका सांसद महेन्द्रध्वज जिसीले पत्रकार नबोल्नेहरुको आवाज र नदेख्नेहरुको आंँखा बन्नुपर्नेमा जोड दिए । संचार क्षेत्र चुनौतिका वीचपनि अघि बढेको भन्दै उनले पत्रकार अनुसन्धान र खोज पत्रकारितामा लाग्नुपर्ने बताए ।

कार्यक्रममा वाग्मती प्रदेश सांसद माया श्रेष्ठ, नेपाली कांँग्रेसका केन्द्रिय सदस्य नैनसिंह महरले नेपालले स्वास्थ्य र पत्रकारिता क्षेत्रमा फड्को मारेको र यसलाई गुणस्तरीयतामा लैजानुपर्नेमा जोड दिएका थिए । स्वस्थ जीवन ,स्वस्थ समाज बाट नै स्वस्थ नेपालको निर्माण हुने उनीहरुको भनाई थियो ।
पत्रकार सुरेश श्रेष्ठले अन्य विषयगत पत्रकारिता जस्तै स्वास्थ्य क्षेत्रको पत्रकारितालाई प्राथमिकता दिनुपर्ने बताए । हरेक जिल्लामा विषयगत पत्रकारिताको व्यवसायिकता आवश्यक हुने श्रेष्ठको भनाई थियो ।

नेटवर्ककका सल्लाहकार डा भोजराज अधिकारीले मोफसलमा स्वास्थ्य पत्रकारिता गर्न चुनौति रहेको भन्दै नेटवर्कले विगत लामोसमयसम्म यस क्षेत्रलाई उजागर गर्न सफल भएको बताए ।
नेटवर्कका अध्यक्ष श्रेष्ठले पछिल्लो समय पत्रकारिता क्षेत्रमा अस्वस्थ प्रतिस्पर्धा बढ्दै गएको बताए ।
मिडीया हाउसले समाचार मात्र सम्प्रेषण नगरी यस क्षेत्रमा उदाहरणीय काम गरेका व्यक्तित्वहरुलाई उर्जा र प्रोत्साहन दिन सम्मान गर्दै आएको उनले बताए ।

यस्ता सम्मानले यस क्षेत्रमा काम गर्ने सबै व्यत्तित्वहरुको उर्जा र मनोबल बढ्ने भएकाले नियमित रुपमा संस्थाले सम्मान गर्दै आएको अध्यक्ष श्रेष्ठको भनाई थियो ।
कार्यक्रममा गोरखापत्र संस्थानका महाप्रबन्धक लाल बहादुर ऐरी , नेपाल प्रेस युनियन का निर्वतमा वरिष्ठ उपाध्यक्ष दिपक आचार्य, वरिष्ठ चिकित्सक , स्वास्थ्यकर्मी लगायतको सहभागिता थियो ।