नेत्रज्योति संघ कीर्तिपूर आँखा अस्पताललाई आँखा सम्बन्धी उपकरण

काठमाडौं । नेपाल नेत्रज्योति संघ कीर्तिपूर आँखा अस्पताल तथा अध्ययन केन्द्रलाई नेपालका लागि जापानी राजदूतले आँखा स्वास्थ्यसम्बन्धी उपकरण हस्तान्तरण गरेका छन् । जापानी राजदूत किकुता युताकाले बुधवार कीर्तिपुर आँखा अस्पतालमा आयोजित कार्यक्रममा उक्त सामग्री हस्तान्तरण गरेका हुन् ।

आँखाको रेटिनासम्बन्धी रोगको उपचारका लागि १ करोड ८५ लाख रुपैयाँ बराबरका स्वास्थ्य सामग्री जापान सरकारको ‘ग्रान्ट्स असिस्टेन्स फर ग्रासरुट्स प्रोजेक्ट’ कार्यक्रम अन्तर्गत हस्तान्तरण गरिएको हो । नेपाल नेत्रज्योति संघद्वारा २०७२ सालमा आँखा उपचार केन्द्रका रूपमा स्थापना भएको कीर्तिपुर आँखा अस्पताललाई २०७४ सालमा आँखा अस्पतालको रूपमा स्तरोन्नति गरिएको थियो ।

उक्त अस्पताललाई सहयोगका लागि नेपालस्थित जापानी दूतावास र नेपाल नेत्रज्योति संघबीच २०७७ कात्तिक १९ गते सम्झौता भएको थियो । अस्पतालले सन् २०२२ मा २३ हजार ५४० जनाको आँखाको उपचार गरेको छ । अस्पतालबाट हालसम्म करीब ७ हजारभन्दा बढी व्यक्तिको आँखाको शल्यक्रिया भइसकेको अस्पतालले जानकारी दिएको छ । तीमध्ये करीब ३ हजार जनाको शल्यक्रिया निःशुल्क गरिएको अस्पतालको भनाइ छ । अस्पतालले हाल काठमाडांै र ललितपुरमा गरी चारओटा आँखा उपचार केन्द्र सञ्चालन गरिरहेको छ । रासस