कर्मचारी बढुवामा विभेद गरिएको भन्दै स्वास्थ्य कर्मीसंघको ध्यानाकर्षण (विज्ञप्ति सहित)

चितवन । कर्मचारी बढुवामा विभेद गरिएको भन्दै नेपाल स्वास्थ्य कर्मी संघ, क्यान्सर अस्पताल, भरतपुरको गम्भिर ध्यानाकर्षण भएको छ । राजनीतिक आस्था र व्यत्तिगत इगोको कारण बढुवाको नतिजामा पूर्वाग्रह राखिएको भन्दै संघले वरिष्ठता र परीक्षाको अंकको आधारमा नतिजा ननिकाली एकलौटी ढंगले अन्य व्यक्तिलाई बढुवा गरेकोले तत्काल मुल्यांकन समितिलाई कारवाही समेत गर्न संघले माग गरेको छ । संघकी सचिव शुशीला अधिकारीद्धारा आज हस्ताक्षरित विज्ञप्तिमा सिनियर र सिनियरिटीको अंक माथि हुंँदा हुंँदै पनि न्यूनतम अंक दिएर इमान्दार स्वास्थ्यकर्मी माथि जघन्य अपराध गरिएको आरोप छ । विज्ञप्तिमा सत्यतथ्य छानवीन र मुल्यांकन सहित १० बुदे माग सहित ध्यानाकर्षण गरिएको छ ।

‘ अस्पतालको नियमावली अनुसार सुपरिवेक्षकको अंक निकटतम सुपरभाईजर र पुर्नरावलोकनकर्ताको अंक सम्बन्धित विभागीय प्रमुखले हाल्ने गरी नियमावली परिवर्तनको लागि अस्पताल सञ्चालक समिति समक्ष जोडदार माग गर्दछौं ।’ विज्ञप्तिमा भनिएको छ ।

योग्य कर्मचारीको हकमा अस्पतालको O & M को व्यवस्था ,पदपुर्ती सम्बन्धीको सम्पुर्ण जिम्मेवारी कार्यकारी निर्देशकले लिनुपर्ने, र उचित छानविन गर्नुपर्ने ,बढुवा प्रक्रियामा प्रतिबद्धता दिने व्यक्तिलाई अध्यक्षमा सहयोग गर्ने, दश बर्ष करारमा रहेका कर्मचारीलाई प्रक्रिया पुर्याई स्वतः स्थायी गर्नुपर्ने, मासिक तथा दैनिक ज्यालादारीलाई सामाजिक सुरक्षा कोषमा आवद्ध गर्नुपर्ने लगायतका माग राखिएको छ ।

यस्तै अस्पतालको कर्मचारी सञ्चयकोष र नागरिक लगानी कोष तुरुन्त जम्मा गर्नुपर्ने, व्यत्ति विशेषलाई लक्षित गरी सामाजिक सञ्जालमा गालीगलौज गर्नेप्रति कारवाही गर्नुपर्ने अन्यथा कडा प्रतिकारमा उत्रने र अस्पतालका सम्पुर्ण सेवा हरुलाई चुस्त दुरुस्त सञ्चालन गर्नुपर्ने माग सहित जारी विज्ञप्तिमा ध्यानकर्षण गरिएको छ ।