म्याद गुज्रेको औषधि दिएर बिरामीको मृत्यु भएपछि क्षतिपूर्तिमा सम्झौता

काठमाडौं ।सुन्धरास्थित ग्रिनसिटी अस्पतालमा उपचारको क्रममा बिरामी मृत्यु भएपछि उत्पन्न तनाव सहमतिमा टुंगिएको छ ।

म्याद गुज्रेको औषधिबाट बिरामीको मृत्युभएपछि बिरामीका आफन्तले क्षतिपूर्तीको माग गर्दै प्रर्दशन गरेका थिए अस्पताल तनावग्रस्त भएपछि सोमबार राति अस्पताल प्रशासन र मृतकका आफन्तबीच उपचारमा लागेको साढे दुई लाख रुपैयाँ मिनाहा गर्ने र थप १० लाख क्षर्तिपूर्ति दिने सम्झौता भएको अस्पताल प्रशासनले जानकारी दिएको छ ।

बिरामीका आफन्तले अस्पतालको फार्मेसीले म्याद गुज्रिएको औषधि दिएको र त्यसैको सेवनका कारण बिरामीको मृत्यु भएको बताउँदै आएका थिए । फार्मेसीले सो औषधि फिर्ता लिनसमेत नमानेको भन्दै उनीहरू आक्रोशित भएका थिए ।
अस्पताल प्रशासनले भने मृतकलाई दिएको औषधिमा समस्या नदेखिएको दाबी गरेको छ । घटनाबारे औषधि व्यवस्था विभागले अनुसन्धान प्रक्रिया अघि बढाएको छ । बिरामी पक्षबाट म्याद गुज्रिएको औषधि बेचेको आरोपछि विभागको टोलीले फार्मेसी अनुगमन गरेको थियो ।
सो क्रममा फार्मेसीले अर्कै औषधिको नाममा बिल काटेको पाइएको विभागका सूचना अधिकारी सन्तोष केसीले बताए ।
“बिरामीले म्याद गुज्रिएको भनी देखाएको एट्रोपिन नामक आईसीयू केयरमा चलाउने औषधि हो । तर, फार्मेसीले अर्कै औषधिको नाममा बिल काटेको देखिएको छ । म्याद गुज्रिएको औषधि फार्मेसीमा मौज्दात भेटिएको छैन । थप अनुसन्धान गर्दैछौँ,“ केसीले भने ।
म्याद गुज्रिएको औषधि बिक्री गरेको आरोपमा फार्मेसीका एक कर्मचारीलाई प्रहरीले नियन्त्रणमा लिएको छ ।