चितवन । पुरानो मेडिकल कलेज, भरतपुरले चितवनमा कार्यरत प्रहरीलाई सम्मान गरेको छ । अस्पताल परिषर भित्रैबाट चोरी भएको चिकित्सकको मोटरसाईकल छोटो समयमै फेला पारेको भन्दै चितवन प्रहरीको कार्यकुशलताको कदरस्वरुप सम्मान गरेको हो । सोमबार जिल्ला प्रहरी कार्यालय परिषरमै गएर अनुसन्धानमा खटिने प्रहरीलाई सम्मान गरिएको सिक्युरिटी बिभाग प्रमुख अर्जुन गहतराजले जानकारी दिनुभयो ।
गहतराजका अनुसार यही श्रावण १७ गते पुरानो मेडिकल कलेज अस्पताल परिसर बाट अस्पतालका कर्मचारी डाक्टर आयाम गौतमको नाममा रहेको रा ४ प ७५४२ नम्बर को एन एस मोटर्साइकल चोरी भएको र उहांँ मार्फत प्रहरीलाई जानकारी गराईएको थियो ।
चितवन प्रहरीले चोरी भएको दुई दिन नबित्दै मोटरसाईकल सहित चोरी गर्नेलाई पक्राउन गर्न सफल भएको थियो । अस्पतालको मुख्य स्थान तथा बाटोमा सिसिटिभि जडान गरिएको र उक्त सिसिटीभी फुटेजको मदतले चोरी गर्नेको हुलिया पत्ता लगाई प्रहरीलाई अनुसन्धान र चोरी गर्नेलाई पक्राउन गर्न सहज भएको सिक्युरिटी बिभाग प्रमुख गहतराजले बताउनु भयो ।
हराएको मोटरसाइकल घटनामा संलग्न अनुसन्धान गर्ने प्रहरीको उच्च मनोबल , हौसला र उर्जा मिलोस भन्ने हेतुले कार्यालयमै गएर उहांँहरुलाई सम्मान गरिएको उहांँले बताउनु भयो । ‘कलेज परिषरमा हराएको केही समयमै भेट्टाएर मोटरसाईकल धनीले पाउनु ठूलो कुरा हो,गहतराजले भन्नुभयो , यसले नेपाल प्रहरी पनि हरेक काममा निपुर्ण र सक्षम छ भन्ने प्रमाणित पनि गराएको छ ।’
मोटरसाईकल चोरीमा संलग्न एकजनालाई पक्राउ गरी अनुसन्धान भईरहेको चितवन प्रहरी प्रमुख प्रहरी उपरीक्षक रामेश्वर कार्कीले बताउनु भयो । यस्ता चोरी कार्यमा संलग्न अन्यको पनि खोजी कार्य भईरहेको प्रहरीले जनाएको छ । हालसम्म १३२ थान चोरी भएका मोटरसाइकल जिल्ला प्रहरी कार्यालयमा रहेको तथ्यांक छ । कार्यक्रममा कलेजका जनसम्पर्क विभाग प्रमुख दुर्गा न्यौपाने, डाक्टर प्रभास राय लगायतको उपस्थिति थियो ।
