काठमाण्डौ । केन्द्रीय कारागार अस्पतालमा नसर्ने रोग ,मानसिक स्वास्थ्य सचेतना, आँखा पाक्ने समस्या (कन्जगंटिभाईटिस) दौतरी शिक्षा र किटनाशक झुल बितरण कार्यक्रम सम्पन्न भएको छ ।
केन्द्रीय कारागारभित्र रहेका कैदीबन्दी र थुनुवाहरुमा खराब जीवनशैली , कमजोर भौतिक संरचना र स्वास्थ्य सचेतनाका कमीले नसर्ने रोग, जीवनशैलीको समस्या साथै संक्रामक रोगहरु दिनप्रतिदिन बढ्दै गईरहेको अस्पतालको बार्षिक प्रतिवेदनमा उल्लेख गरिएको छ ।
आफ्ना सहकर्मी र साथीभाईलाई नै स्वास्थ्य परामर्शदाता बनाउने उदेश्यले नेपाल स्वास्थ्य समाजको प्राविधिक सहयोगमा केन्द्रीय कारागार अस्पतालले डिल्लीबजार, नख्खु, महिला, भद्र तथा केन्दीय सुधार गृहका अस्पताल नाईके, सह नाईके र स्वच्छ आचरण भएका साथै सहयोगी मन भएका करिब ९५ जनालाई दौतरी शिक्षाको तालिम प्रदान गरिएको अस्पतालका निर्देशक डा.प्रकाश बुढाथोकीले बताउनु भएको हो । उक्त कार्यक्रममा सहभागीहरुलार्ई प्रमाणपत्र, ट्रयाकसुट समेत वितरण गरिएको थियो ।
यस कार्यक्रममा बरिष्ठ आँखारोग बिशेषज्ञ प्रा.डा.सबिना श्रेष्ठ , बरिष्ठ मानसिक रोग विशेषज्ञ डा.बासुदेब कार्की, बरिष्ठ अर्थोपेडिक सर्जन डा. रुद्र प्रसाद मरासिनी,लगाएतले आ–आफ्नो बिषयमा प्रस्तुतीकरण दिनुभएको थियो । अस्पतालका निर्देशक डा.बुढाथोकीका अनुसार संस्थामा उपलब्ध किटनाशक झुल अस्पतालका भर्ना भएर बसेका बिरामी, केन्द्रीय सुधार गृह, भद्र सुधार गृह, महिला सुधार गृह,नख्खु र डिल्लीबजार सुधार गृहमा रहेका जेष्ठ नागरिक तथा जोखिममा रहेका बिरामीलाई वितरण गरिने बताउनु भयो ।
