ललितपुर । महिला, बालबालिका तथा ज्येष्ठ नागरिकमन्त्री सुरेन्द्रराज आचार्यले देशभर अन्धोपन निवारणका लागि सरोकारवाला सबै निकायलाई आह्वान गर्नुभएको छ ।
नेपाल नेत्रज्योति सङ्घ र दातृ निकाय सिबिएम ग्लोबलबीचको सहकार्यको ४० वर्ष पूरा भएको अवसरमा आज आयोजित कार्यक्रममा मन्त्री आचार्यले सरकारले आँखा स्वास्थ्य रणनीतिको सफल कार्यान्वयनका लागि सरकारसँगै सेवा प्रदायक संस्था र दातृ निकायबीच सहकार्य हुने विश्वास व्यक्त गर्नुभयो ।
उहाँले यी दुई संस्थाका बीचमा सहकार्य हुँदाको समयमा शून्य दशमलव ८४ प्रतिशत रहेको नेपालको अन्धोपनाको अवस्था अहिले घटेर शून्य दशमलव २८ प्रतिशतमा पुगेको स्मरण गर्दै अन्धोपन निवारणका लागि सरकारले सहयोग र सहकार्य गर्ने प्रतिबद्धता व्यक्त गर्नुभयो ।
“सन् २०३० मा नेपालबाट उपचारपछि निको हुने अन्धोपन निवारण गर्ने नेपाल सरकारको योजनालाई तपाईं हामी सबैको सहकार्यले सफल हुने विश्वास पनि मैले लिएको छु”, उहाँले भन्नुभयो, “आगामी दिनमा सरकारका तर्फबाट हुनसक्ने सहयोग र सहकार्यका लागि मैले आफ्नोतर्फबाट सहयोग गर्ने प्रतिबद्धता व्यक्त गर्न चाहन्छु ।”
उहाँले आँखा उपचारमार्फत स्वास्थ्य पर्यटन विकाससँगै वैदेशिक मुद्रा आर्जन भइरहेको बताउनुभयो । “केही वर्ष अघिसम्म पनि नेपालबाट आँखा उपचारका लागि भारत लगायतका देशमा जानुपर्ने हाम्रो बाध्यता थियो”, उहाँले भन्नुभयो, “तर नेपाल नेत्रज्योति सङ्घ जस्ता सामाजिक संस्थाको प्रयास र मेहनतले वार्षिक लाखौँ भारतीय नागरिक नेपालमा आएर उपचार गराइरहनुभएको छ । यो नेपालका लागि गर्वको कुरा हो ।”
चालीस वर्षको सहकार्यमा एक करोड २० लाखभन्दा बढीलाई आँखा उपचार सेवा उपलब्ध गराएको नेपाल नेत्र ज्योति सङ्घका अध्यक्ष डा चेतराज पन्तले जानकारी दिनुभयो । उहाँका अनुसार सङ्घबाट २० लाखभन्दा बढी बिरामीको आँखाको शल्यक्रिया सम्पन्न भएको छ । सन् १९८२ मा नेत्रज्योति सङ्घको आग्रहमा सिबिएमबीच औपचारिक सहकार्यको प्रारम्भ भएको थियो । सङ्घले अहिले देशभरमा २७ वटा आँखा अस्पताल, एक सय ५० वटा आँखा उपचार केन्द्र तथा ४४ वटा जिल्ला शाखामार्फत आँखा उपचार सेवा प्रवाह गरिरहेको छ । रासस
