भरतपुर । । चनौलीमा डेँगुसम्बन्धी सचेतना कार्यक्रम सम्पन्न गरिएको छ । नेपाल रेडक्रस सोसाइटीको ६१ औँ स्थापना दिवसको अवसरमा चनौली उपशाखाको आयोजनामा चनौलीबजार सरसफाइ तथा डेँगु रोगसम्बन्धी सचेतना अभियान सञ्चालन गरिएको हो ।
कार्यक्रमका प्रमुखअतिथि एवं नेरेसो जिल्ला शाखा चितवनका उप–कोषाध्यक्ष चिजकुमार आलेले बर्खाको महिनासँगै जताततै पानी जम्न थालेपछि यो रोगको प्रकोप बढ्ने हुँदा स्थानीयले आफू बस्ने ठाउँवरिपरि फालिएका खाली बट्टा, ड्रम, पुराना टायरमा पानी जम्न नदिन आग्रह गरे ।
पछिल्लो समय चितवनमा डेँगुको सङ्क्रमण बढ्दै गएको छ । सङ्क्रमणको जोखिम बढेसँगै स्थानीय सरकार, टोल विकास संस्था र सरोकारवाला निकायहरूले लार्भा खोजी गरी नष्ट गर्ने अभियान चलाएका छन् ।
यो रोग घरवरिपरि बस्ने एडिज एजेप्टाई प्रजातिको पोथी लामखुट्टेको टोकाइबाट सर्ने गर्दछ । बिहान र साँझपखको समयमा यी लामखुट्टे बढी सक्रिय हुने हुँदा यो समयमा थप सचेत हुनुपर्ने आलेले बताए ।
विगत केही समयदेखि चितवनमा डेँगुका बिरामीको संख्या बढ्दै गएका कारण आफ्नो घर र वरपरका स्थान सरसफाइमा विशेष ध्यान दिन नेरेसो चनौली शाखाका सभापति ओमप्रकाश लामिछानेले आग्रह गरे । यो रोग अघिल्लो वर्षको तुलनामा बढ्दै गएको हुँदा लामखुट्टेको वृद्धि विकास नियन्त्रण गर्न सबै जना लाग्नुपर्ने उनको भनाइ थियो ।
यसैबीच, भीमनगर माविका विद्यार्थी, इलाका प्रहरी कार्यालय चनौलीका प्रहरी तथा रेडक्रसका सदस्यहरूको सहभागितामा चनौलीबजारदेखि भीमनगर माविसम्मका सडकछेउमा सरसफाइसमेत गरिएको थियो ।
