मकवानपुर । स्वास्थ्य तथा जनसङ्ख्यामन्त्री मोहनबहादुर बस्नेतले आज हेटौँडामा सिद्धस्थली ग्रामीण सामुदायिक अस्पतालको उद्घाटन गर्नुभएको छ ।
सो अवसरमा मन्त्री बस्नेतले देशभित्र चिकित्सा शिक्षा अध्ययन गर्ने राम्रो वातावरण निर्माण गर्न चिकित्सा शिक्षा ऐन संशोधन भइरहेको बताउनुभयो । हालको चिकित्सा शिक्षा ऐन स्वास्थ्य जनशक्ति उत्पादनमा बाधकको देखिएकाले सुधार गर्न लागिएको उहाँले जानकारी दिनुभयो ।
जनतालाई सर्वसुलभ रूपमा स्वास्थ्य सेवा प्रदान गर्न दक्ष स्वास्थ्यकर्मीहरूको दरबन्दी थप गर्ने काममा सरकार लागि रहेको र गरिब तथा विपन्न वर्गको स्वास्थ्य उपचार निःशुल्क गर्ने काम देशभरि सुरु गरेको मन्त्री बस्नेतले बताउनुभयो ।
बागमती प्रदेशका स्वास्थ्यमन्त्री उत्तम जोशीले सङ्घीय सरकारले प्रदान गरिरहेको क्यान्सर रोगको उपचारमा रु एक लाख अनुदानमा बागमती प्रदेश सरकारले थप ५० हजार अनुदान दिएको र हृदयघात भएका रोगीलाई रु एक लाख १० हजार आर्थिक सहयोग गर्दै आएको बताउनुभयो । उहाँले बागमती प्रदेशभर १८ अस्पतालमा उपलब्ध शैय्यामा १० प्रतिशत गरिब र विपन्न रोगीलाई निःशुल्क उपचार गर्ने व्यवस्था सुरु गरिएको जानकारी दिनुभयो ।
डा अमन गौतमको संयोजनमा विदेशमा कार्यरत नेपाली चिकित्सक, बेलायतका सामाजिक सङ्घ संस्थाको आर्थिक सहयोगमा हेटौँडा उपमहानगरपालिका–६ रामनगरमा रु पाँच करोडमा निर्माण भएको सामुदायिक अस्पताल निर्माण गरिएको हो । यस अस्पतालले हेटौँडा उपमहानगरपालिकाबाट १५ शैय्याको स्वीकृति पाएको छ ।
यस अस्पतालबाट आगामी मङ्सिरदेखि उपचार सेवा सुरु गरिने र अस्पतालबाट बहिरङ्ग सेवा, ल्याव सेवालगायत सेवा सुरु गरी आगामी दिनमा मुटुसम्बन्धी सबै विशेषज्ञ सेवा दिने र ५० शैय्या क्षमता विस्तार गर्ने लक्ष्य राखिएको सो अस्पतालका संयोजक डा गौतमले जानकारी दिनुभयो । रासस
