काठमाडौँ । वरिष्ठ मुटु रोग विशेषज्ञ डा.ओममूर्ति अनिलले विश्व रेकर्ड कायम गर्नुभएको छ । उहाँले विश्व मुटु दिवसका अवसरमा गत असोज १२ गते आफ्नो फेसबुक पेजबाट मुटुरोगको रोकथाम सम्बन्धी जनचेतनामूलक प्रत्यक्ष प्रसारणबाट विश्व रेकर्ड कायम गर्नुभएको हो ।
डा.ओममूर्तिले आफ्नो फेसबुकमार्फत प्रत्यक्ष प्रसारणमा मेडिकल साइन्सको अति महत्वपूर्ण मानिने ‘कार्डियोभास्कुलर स्वास्थ्य सचेतनाका लागि सबैभन्दा बढी दर्शक’ भन्ने शीर्षकमा गिनिज वल्र्ड रेकर्ड कायम गरेको डा.ओममूर्ति अनिलले जानकारी दिनुभयो ।
“गिनिज वल्र्ड रेकर्डको प्रमाणपत्र प्राप्त गर्न भने केही समय लागेको हो । व्यक्तिगत क्षमता, सीप र पहिचानभन्दा भिन्न उद्देश्य बोकेको यस कीर्तिमानले संसारभरका मानिसका लागि प्रेरणाको स्रोत सावित हुने आशा गरेको छु”, उहाँले भन्नुभयो, “यो कीर्तिमानले अन्तर्राष्ट्रियस्तरमा स्वास्थ्य सचेतनाका लागि सामाजिक सञ्जालको भूमिका र उचित प्रयोगको बारेमा उदाहरणीय बन्ने उहाँको भनाई छ ।” असोज १२ गते साँझ ७ः१५ बजेदेखि सुरु भएको आधा घन्टा लामो उक्त प्रस्तुतिमा एघार हजार २ सय १२ जनाले एकैपटक प्रत्यक्ष प्रसारण हेर्नुभएको थियो ।
सो फेसबुक प्रत्यक्ष प्रसारणलाई ९ हजार जनाले शेयर गर्नुभएको थियो, भने २० हजार लाइक र १८ हजार कमेन्ट प्राप्त भएका थिए । फेसबुकमार्फत प्रत्यक्ष प्रसारण सम्पन्न हुँदासम्म १ लाख ५० जनाले हेर्नुभएको थियो । प्रत्यक्ष प्रसारणपछि ‘गिनिज वल्र्ड रेकर्ड’का सम्पूर्ण मापदण्ड पूरा गरि डा.ओममूर्तिले विश्व रेकर्ड कायम भएको दाबी पेश गर्नुभएको थियो ।
उहाँले मुटुरोग सम्बन्धि उपचार तथा रोकथामका निम्ति लामो समयदेखि प्रत्यक्ष स्वास्थ्य सेवा सहित नियमित रुपमा सामाजिक संजालमार्फत पनि जनचेतनामूलक अभियान सञ्चालन गर्दै आउनुभएको छ । डा.अनिलले दोस्रो पटक विश्व रेकर्ड मार्च २०२३ मा बनाउन सफल हुनुभएको थियो । सन् २०१३–१४ मा इमेज एफ.एम. १०३.६ मेगाहर्जबाट अतिथि वक्ताका रुपमा लगातार ४४ हप्ताको इपिसोटमा ‘मुटु स्वास्थ्य जागरुकता’ नामक रेडियो कार्यक्रममा अतिथि वक्ताको रूपमा भाग लिनुभएर विश्व रेकर्ड राख्नुभएको थियो । सो रेडियो कार्यक्रमको संचालन वरिष्ठ संचारकर्मी शैलजा सिंहले गर्नुभएको थियो । साथै डा.ओममूर्ति अनिलद्धारा लिखित जीवन्त सम्बन्ध नामक पुस्तक हाल बजारमा पाठकबीच निकै लोकप्रिय बनेको छ ।
