असक्त व्यक्तिहरुले घरमै ह्वील चेयर पाउँदा दङ्ग

कञ्चनपुर । कृष्णपुर नगरपालिका–२ सत्यालफाँटाकी माधवी भट्ट ह्वील चेयरमा बसेर घरबाहिर हिँड्डुल गर्न पाउँदा निकै खुसी हुनुहुन्छ । दुर्घटनामा परेर स्पाइनल कर्ड इन्जुरी हुँदा भट्ट घरभित्रै बस्दै आउनुभएको थियो ।

“ह्वील चेयर पाएपछि घरभित्र बाहिर गर्नका लागि निकै सहज भएको छ”, उहाँले भन्नुभयो, “ह्वील चियर पाउँदा खुट्टामै उभिएर हिँडे जस्तै महसुस गरी रहेको छु ।” उहाँलाई वडाध्यक्ष अर्जुन साउदले ह्वील चेयर घरमै पुगेर उपलब्ध गराउनुभएको हो ।

माधवी जस्तै पक्षघात भएर हिँड्डुल गर्न नसक्ने अवस्थाकी २२ वर्षीय मनीषा चन्दलाई पनि अध्यक्ष साउदले ह्वील चेयर उपलब्ध गराउनुभएको छ । ह्वील चेयर पाएपछि मनीषालाई घरभित्र बाहिर आउजाउ गर्न सहज भएको छ । “ह्वील चेयर नहुँदा कोठामै थन्किएर बस्नुपरेको थियो”, मनिषाले भन्नुभयो, “भित्रबाहिर जानका लागि घरपरिवारका सदस्यको सहयोग लिनुपर्ने बाध्यता थियो, अहिले ह्वील चेयर पाएपछि आफन्तको थोरै सहयोगमा बाहिरभित्र गर्न सक्ने भएको छु ।”

“गाउँ घर टोलमा शारीरिक अपाङ्गता भएका व्यक्तिबारे जानकारी पाइएपछि निवेदन मागेर वडाकै बजेटमा ह्वील चेयर खरिद गरी घरमै पुगेर वितरणको कार्य गर्दै आएका छौँ”, अध्यक्ष साउदले भन्नुभयो, “चालु आवको हालसम्म शारीरिक अपाङ्गता भएका ‘क’ श्रेणीको परिचयपत्र पाएका आठ व्यक्तिलाई ह्वील चेयर प्रदान गरेका छौँ ।”

थप दुई शारीरिक अपाङ्गता भएका व्यक्तिलाई ह्वील चेयर उपलब्ध गराउने तयारीमा रहेको उहाँले बताउनुभयो । ह्वील चेयर उपलब्ध गराइका अपाङ्गता भएका व्यक्तिलाई केही दिनभित्रै दिशापिसाब गर्न सहज हुने कुर्सी उपलब्ध गराउन लागेको अध्यक्ष साउदले जानकारी दिनुभयो ।

“शारीरिक अपाङ्गता भएका वडाका जति व्यक्ति सम्पर्कमा आउँछन् सबैलाई चेयर उपलब्ध गराउन तयार छौँ”, वडाध्यक्षले भन्नुभयो, “वडा, नगरपालिका, स्वास्थ्य कार्यालय र सङ्घ संस्थासँग सहयोग मागेर चेयर उपलब्ध गराउने कार्य हुन्छ ।”

अपाङ्गता भएका विशेष क्षमता भएका व्यक्तिलाई आत्मनिर्भर बनाउनका लागि क्षमता अभिवृद्धिसँगै आयआर्जनका कार्यक्रमसँग जोड्नका लागि वडाका तर्फबाट कार्यक्रम सञ्चालन गर्ने उहाँको भनाइ छ । “अपाङ्गता भएका व्यक्तिलाई माया स्नेह दिएर मात्रै पुग्दैेन, आत्मनिर्भर बनाउन अवसर दिनुपर्छ, त्यसका लागि सहज वातावरण तयार गर्न तत्पर छौँ”, उहाँले भन्नुभयो । रासस