तिलाका स्वास्थ्य संस्थामा औषधि आपूर्ति हुन थाल्यो

जुम्ला । तिला गाउँपालिकाभित्रका स्वास्थ्य संस्थामा औषधि अभाव शीर्षकमा गत पुस १६ गते राष्ट्रिय समाचार समिति (रासस) ले समाचार प्रकाशित गरेपछि पालिकाको स्वास्थ्य शाखाबाट अहिले औषधि अभाव रहेका स्वास्थ्य संस्थामा औषधि पठाउन सुरु गरिएको छ ।

करिब रु आठ लाख बराबरका औषधि खरिद गरी अभाव रहेका स्वास्थ्य संस्थामा पठाइएको गाउँपालिका स्वास्थ्य शाखा प्रमुख हर्कबहादुर रावतले जानकारी दिनुभयो । गाउँपालिका अध्यक्ष, उपाध्यक्षको सहभागितामा अभाव रहेका स्वास्थ्य चौकीमा आज औषधि वितरण गरिएको हो ।

प्रमुख रावतले भन्नुभयो, “यहाँका १३ वटै स्वास्थ्य संस्थामा औषधि अभाव हुन नदिनका लागि थप औषधि खरिद प्रक्रिया अगाडि बढेको छ ।” पालिकाले चालु आवमा स्वास्थ्य शाखालाई रु आठ लाख बजेटविनियोजित गरेको छ । शाखामा बजेट कम भएपछि जनस्वास्थ्य सेवा कार्यालय जुम्लाबाट औषधि माग गरी स्वास्थ्य संस्थामा पठाइएको स्वास्थ्य शाखाले जनाएको छ ।

“सरकारले निःशुल्क उपलब्ध गराउन भनेका औषधि स्वास्थ्य चौकीमा उपलब्ध गराउन स्वास्थ्य शाखालाई निर्देशन दिएको छु”, तिलका गाउँपालिका अध्यक्ष मोतीलाल रोकायाले भन्नुभयो । पालिका सबै स्वास्थ्य संस्थामा अहिले सिटामोल, ब्रोफिनलगायत औषधि पठाइएको गाउँपालिका उपाध्यक्ष गोरीकला बुढाले बताउनुभयो ।

सरकारले स्वास्थ्य संस्थामा औषधि खरिद गर्न स्थानीय तहमा पठाएको रु २१ लाख बजेटमार्फत औषधि बोलपत्र प्रक्रियाबाट खरिद गरिने गाउँपालिकाले जनाएको छ । साधारण रुघाखोकी, ज्वरो तथा घाउचोट लागेका बिरामीलाई आवश्यक औषधि स्वास्थ्य संस्थामा नभएको भन्दै तिलाका स्थानीयवासीले सामाजिक सञ्जालमार्फत विरोध गरेका छन् ।

यहाँका स्वास्थ्य संस्थामा औषधि अभाव भएकोसम्बन्धी राससद्वारा सम्प्रेसित समाचार विभिन्न सञ्चारमाध्यममा प्रकाशित भएको थियो । उक्त समाचार प्रकाशित भएपछि गाउँपालिकाले चासो दिएको थियो । रासस