नेपालको पत्रकारिता अब थप जिम्मेवार हुनुपर्छ : वरिष्ठ नेता डा. कोइराला

चितवन । नेपाली कांँग्रेसका वरिष्ठ नेता तथा प्रतिनिधि सभा सदस्य डा. शशांक कोइरालाले नेपालको पत्रकारिता थप जिम्मेवार हुनुपर्ने बताउनु भएको छ । शनिबार स्वास्थ्य दर्पण मिडीया नेटवर्क प्रालीको आठौं बार्षिकोत्सवको अवसरमा बोल्दै उहांँले नेपालको पत्रकारिताले आफ्नो पेशागत धर्म अनुसार काम गर्नु पर्ने बताउनु भएको हो ।
‘देशको बिषम परिस्थितिमा झन पत्रकारिता जिम्मेवार र मर्यादित हुनुपर्छ उहांँले भन्नुभयो, जसले गर्दा सरकार जिम्मेवार हुन कर लाग्छ भने जनतामाझ विश्वासयोग्य बन्न मदत पुग्छ ।’ उहांँले पछिल्लो समय राजनीतिमा देखिएको अस्थिरताले आफूलाई निराश समेत बनाएको बताउनु भयो ।‘ नेपालको

राजनीतिमा आफ्नो खुबी र विवेक अनुसार काम गर्न पाईएको छैन, उहांँले भन्नुभयो, मैले स्वास्थ्य क्षेत्रबाट राजनीतिमा आउनु गल्ती त गरिन् भन्ने लागेको छ ।’ सो अवसरमा बोल्दै वागमती स्वास्थ्य मन्त्री उत्तम जोशीले पत्रकारिताले सरकार र जनताबीच पुलको काम गर्दै आएको बताउनु भयो ।

उहांँले जनभावना अनुसार काम गर्न मन लागेपनि नीति निर्माण र सिमीत साधन श्रोतका कारणले अपेक्षा अनुसार काम गर्न नसकिएको बताउनु भयो ।
स्वास्थ्य दर्पणले पत्रकार , चिकित्सक, सवास्थ्यकर्मीको लागि हौसला, उत्प्रेरणाको काम गरेको बताउंँदै उहांँले अन्य नीजि सञ्चार माध्यमले पनि विषयगत पत्रकारितालाई जोड दिनु पर्ने बताउनु भयो ।

नेपाल चिकित्सक संघका केन्द्रिय अध्यक्ष डा. अनिल विक्रम कार्कीले नेपालको स्वास्थ्य सम्बन्धी सञ्चार माध्यम र पत्रकारले अब स्वास्थ्य दर्पण मीडिया नेटवर्कले स्वास्थ्य क्षेत्रको विकास र जनचेतनामा उल्लेखनीय काम गरेको भन्दै प्रशंसा गर्नुभयो ।

स्वास्थ्य दर्पण नेटवर्कका अध्यक्ष सन्दीप कुमार श्रेष्ठले देशको हालको विषम परिस्थितिबीच पनि संस्थागत सामाजिक उत्तरदायित्व अन्तर्गत अवार्ड कार्यक्रमलाई निरन्तरता दिंँदै आएको बताउनु भयो ।