आँखा वरपरको हड्डी भाँचिएको उपचारबारे कार्यशाला गर्दै तिलगङ्गा अस्पताल

काठमाडौँ । तिलगङ्गा आँखा अस्पतालले आँखा वरपरको हड्डी भाँचिएको उपचारबारे जानकारी दिन प्रत्यक्ष प्र्रसारणसहित कार्यशाला गर्ने भएको छ ।

अस्पतालले यही बिहीबार आँखा र वरपरको हड्डी भाँचिएका तीन जना बिरामीको शल्यक्रियासहितको कार्यशाला आयोजना गर्ने जानकारी दिएको हो । आज यहाँ आयोजित पत्रकार सम्मेलनमा अस्पतालका अकुलोप्लाष्टिक तथा अकुलर अंकोलोजी सर्जन डा पूर्णिमा राजकर्णीकार स्थापितले दुई दिने कार्यशालाबारे जानकारी दिँदै सिङ्गापुरको नेसलन युनिभर्सिटी अस्पतालका डा गङ्गाधर सुन्दरको नेतृत्वमा कार्यशाला आयोजना हुने बताउनुभयो ।

डा सुन्दरको नेतृत्वमा डा पूर्णिमा, म्याग्जीलोफेसियल सर्जन प्रा डा आलोक सग्तानी र वरिष्ठ अकुलोप्लाष्टिक सर्जन प्रा डा रोहित सैजुको समूहले उक्त कार्यशाला सञ्चालन गर्नेछन् ।

उक्त समूहले आँखा र आँखाको वरपरको हड्डी भाँचिएका तीन जना बिरामीको शल्यक्रिया गर्ने छ । बिहीबार बिहान ९ देखि अपराह्न ३ बजेसम्म गरिने शल्यक्रियालाई अस्पतालले प्रत्यक्ष प्रसारणमार्फत कार्यशालामा छलफल गरिनेछ । शल्यक्रिया प्रदर्शनसहितको कार्यशालाले ‘फ्र्याक्चर पुनःस्थापना’मा नेपालमै नयाँ आयाम थप्न भूमिका खेल्ने डा पूर्णिमाको भनाइ छ ।

“आँखा वरपरको हड्डी भाँचिएको पुनःस्थापना गर्नु एक जटिल र कठिन शल्यक्रिया हो”, डा पूर्णिमाले भन्नुभयो, “यसपटक ओस्टियोपोर सामग्रीको समेत प्रयोग गरेर फ्र्याक्चर पुनःस्थापना शल्यक्रियाको प्रत्यक्ष प्रसारण गरी छलफल गर्ने तयारी छ ।”

उहाँका अनुसार प्रत्येक वर्ष तिलगङ्गा आँखा प्रतिष्ठानमा करिब पाँच सय बिरामी आँखाको चोटको उपचारका लागि आउने गरेका छन् । जसमा औषतमा आधा जतिलाई शल्यक्रियाको आवश्यकता हुन्छ । विगत एक वर्षदेखि हामीले म्याक्जिलोफेसियल सर्जनसँग सहकार्य गरेर मान्यताप्राप्त टाइटेनियम प्लेट प्रयोग गरी जटिल फ्र्याक्चरसमेत पुनःस्थापना गर्दै आएका छौँ ।

प्रतिष्ठानमा सन् २००४ देखि प्रा डा रोहित सैजुद्वारा आँखा र वरपरको हड्डी भाँचिएको पुनःस्थापना शल्यक्रिया हुँदै आएको छ । विगत एक वर्षदेखि अस्पतालले म्याक्जिलोफेसियल सर्जनसँग सहकार्य गरी मान्यताप्राप्त टाइटेनियम प्लेट प्रयोग गरी जटिल फ्याक्चरसमेत पुनःस्थापना गर्दै आएको छ ।

सोही दिन सर्जिकल कार्यशाला समापन भएपछि ‘अर्बिटल ट्रमा’को चुनौतीबारे निरन्तर चिकित्सा शिक्षा सत्र आयोजना हुने अस्पतालले जनाएको छ । यस्तै, शुक्रबार आँखामा थाइराइड रोगले पार्ने अवसरबारे छलफल गरिने उहाँले जानकारी दिनुभयो ।

“पछिल्लो समय थाइराइडको समस्या भएका मानिसहरु बढ्दै गएको र यसले आँखामा पनि प्रभाव पारिरहेको विशेषज्ञको अनुभव छ । उक्त सत्रमा ओकुलोप्लास्टिक सर्जन, नेत्र रोग विशेषज्ञ र हर्मोन रोग विशेषज्ञ सहभागी हुनुहुनेछ”, डा पूर्णिमाले भन्नुभयो । कार्यशालाले शल्य चिकित्सकको सीप र ज्ञान बढाउन सहयोग पु¥याउने उहाँको भनाइ छ ।

कार्यशालामा ओकुलोप्लास्टिक सर्जन, नेत्र रोग विशेषज्ञ र म्याक्सिलोफेसियल सर्जनसहित एक सय जनाको सहभागिता जनाउने अस्पतालको भनाइ छ । रासस