काठमाडौं । शहीद गंगालाल राष्ट्रिय हृदय केन्द्रमा मुटुको ‘डबल स्वीच शल्यक्रिया’ सफल भएको छ ।
मुटुको सर्जरीमा जटिल र जोखिमयुक्त मानिने यो शल्यक्रिया नवलपरासी जिल्लाकीे १४ वर्षीया बालिकामा गरिएकोबारे सर्जरी टीमका वरिष्ठ मुटुशल्यचिकित्सक डा.रविन्द्रभक्त तिमलाले जानकारी दिनुभयो ।
उक्त शल्यक्रियामा डा.रविन्द्रभक्त तिमला सहित डा.सुजन बोहरा,डा.मरिषा अर्याल र डा.सन्दीप भण्डारी लगायतको मेडिकल टीमले गर्नुभएको हो ।
माघ १७ गते अस्पताल भर्ना गरिएकी बालिकामा शरीर निलो हुने,राम्रोसँग हिँड्न नसक्ने र अर्धचेत हुने लक्षण देखापरेको थियो । बालिकामा रोगको पहिचान हुन ४२ दिनसम्म अस्पताल भर्ना गर्नुपरेको थियो ।
लगातारको परीक्षणपछि बालिकामा चारवटा संरचनागत त्रुटि पहिचान भएको थियो । मुटु शल्यचिकित्सक डा.रविन्द्रभक्त तिमलाको भनाई अनुसार साइटस इनभर्सस, करेक्टेड ट्रान्सपोजिसन अफ ग्रेट आर्टरिज, भेन्ट्रिकुलर सेप्टल डिफेक्ट,पल्मोनरी स्टेनोसिस जस्ता चारवटा संरचनागत त्रुटी भएको र बालिकाको दुई ठाउँमा रगत विपरीत ठाउँमा बगिरहेको थियो ।
सेनिङ र स्टेलिङ नामक दुवै छुट्टाछुट्टै शल्यक्रिया गर्न शल्यक्रिया संलग्न टोलीलाई १० घण्टा लागेको थियो । उनको मुटु साढे चार घण्टा पूरै बन्द गरि शल्यक्रिया गरिएको हो । शल्यक्रियामा बालिकाको मुटुभित्र र बाहिर गरी दुवैतिर रगत बग्ने बाटो मिलाइएकाले यसलाई ‘डबल स्विच’ शल्यक्रिया भनिएको सर्जरीमा संलग्न चिकित्सक डा. तिमिलाको भनाई थियो । सर्जरीपछि बालिकाको स्वास्थ्य अवस्था राम्रो रहेको सर्जरी टीमका चिकित्सकहरुले बताउनुभएको हो ।
