चितवन । चितवनमा सम्पन्न नवौं नेपाल फर्मा एक्स्पो २०२४ मा अवलोक कर्ताको संख्या आधा भन्दा बढी घटेको देखिएको छ ।
नेपाल औषधि उत्पादक संघ (एपोन) द्धारा चितवनमा सञ्चालित आठौं एक्स्पोमा १५ हजार बढीले अवलोकन गरेकोमा भन्दा यस वर्ष ६ हजार दुईसयले अवलोकन गरेका हुन् ।
एक्स्पोका मिडिया संयोजक सन्तोष बरालका अनुसार एक्स्पोमा खल्ती एप मार्फत् तीन हजार जनाले रजिष्ट्रेशन गरेर अवलोकन गरेका छन् ।
डाक्टर, पत्रकार, औषधि उद्योगी, उद्योगका कर्मचारी, बजार प्रतिनिधि, मेडिकल विद्यार्थी गरेर तीन हजार दुई सय गरी छ हजार दुई सयले एक्स्पो अवलोकन गरेको उनले जानकारी दिए । तर एपोनले यस बर्ष १५ हजार बढी अवलोकनकर्ता आउने अपेक्षा गरेको थियो ।
संयोजक बरालले अर्थतन्त्रमा देखिएको सुस्तता र आर्थिक मन्दीका कारण उपस्थिति कम भएको बताए । उनले भने “आर्थिक मन्दीको असरका बीचपनि यत्तिको उपस्थिति हुने राम्रो हो ।” समग्रमा एक्स्पो सफल भएको उनको भनाई छ । अवलोकन कर्ताको संख्या घटेपनि एक्स्पोका कारण चितवनको आर्थिक कारोबार ११ करोड रुपैंया बढी भएको एपोनको प्रक्षेपण छ ।
कोभिड महामारी लगत्तै देशको अर्थतन्त्रमा देखिएको संकट र यही समयमा सरकारले उद्योगीहरुका लागि लिएको गलत नीतिका कारण औषधि उद्योगीहरुको कारोबार घट्दै गएको एपोनले बताएको छ ।
यही फागुन २५, २६ र २७ गते चितवन प्रदर्शनी केन्द्रमा एक्स्पो भएको थियो । एक्स्पोमा स्वदेशी औषधि उद्योग र विदेशी उपकरण, प्रविधि र कच्चा पदार्थका स्टलहरु रहेका थिए ।
एपोनले हरेक दुई वर्षमा फर्मा एक्स्पो आयोजना गर्दै आएको छ । नेपाली औषधिको प्रविधि, गुणस्तर, क्षमता लगायतका विषयमा औषधि लेख्ने, बेच्ने र उपभोग गर्नेहरुलाई बुझाउन एक्स्पो सफल भएको आयोजकको भनाई छ ।
