भरतपुर अस्पतालमा ब्लड बैंकको स्थापना, भोलिबाट सञ्चालनमा आउंँदै

चितवन । केन्द्रिय अस्पतालको रुपमा स्थापना भएको भरतपुर अस्पतालले ब्लड बैंक (रक्तसञ्चार केन्द्र) सञ्चालनमा ल्याउने भएको छ । अस्पतालमा आउने बिरामीलाई रगत अभावलाई सहज रुपमा पूर्ति गर्ने उद्धेश्यसहित अस्पतालले ब्लड बैंकको स्थापना । जेठ १ गते भोलिबाट नियमित सञ्चालन गर्ने गरी तयारी गरिएको अस्पतालले जनाएको छ ।

अस्पतालका प्रमुख मेडिकल सुपरिटेण्डेण्न (मेसु) डा श्रीराम तिवारीले हरेक बर्ष अस्पतालमा रगतको अभाव हुंँदै आएको बताउंँदैे अस्पतालमा आउने बिरामीलाई अस्पतालमै रगतको व्यवस्था होस् भन्ने उद्देश्यले ब्लड बैंक स्थापना गर्न लागिएको बताउनु भयो । अस्पतालले आइतबार नर्सिङ्ग दिवसको अवसरमा अस्पताल परिषरमा रक्तदान गरेर रगत संकलन गर्ने काम गरेको छ ।

अस्पतालको ‘बि ब्लक’ को भुई तलामा ब्लड बैंक रहने मेसु डा तिवारीले जानकारी दिनुभयो । अस्पताल विकास समितिको तर्फबाट बजेटको व्यवस्थापन गरेर ब्लड बैंकका लागि ९० प्रतिशत तयारी पूरा भइसकेको तिवारीले बताउनु भयो । ब्लड बैंक सञ्चालनका लागि करिब ३५ लाख रुपैयाँ खर्च भईसकेको उहाँको भनाई छ ।

ब्लड बैंकबाट शुरुवाती चरणमा ब्लडको सबै प्रकार दिन नसकिए पनि होल ब्लड लगायतका केही उत्पादन बिरामीलाई दिने गरी तयारी गरिएको छ । ब्लड बैंक सञ्चालनका लागि राष्ट्रिय जनस्वास्थ्य प्रयोगशाला टेकुबाट स्वीकृति लिने क्रममा रहेको उहाँले बताउनु भयो ।

चितवनमा हालसम्म नेपाल रेडक्रस सोसाईटीले सञ्चालन गरेको रक्त सञ्चार केन्द्र (ब्लड बैंक) बाट मात्रै बिरामीले रगत लिने व्यवस्था रहेको थियो । रेडक्रसको ब्लड बैंक पनि भरतपुर अस्पताल परिषरमै छ ।