हनोई । भियतनाममा यस वर्षको सुरुदेखि एक सय ४१ वटा औलोका घटना रेकर्ड गरिएको छ । सन् २०२३ को सोही अवधिको तुलनामा एक सय सात दशमलव चार प्रतिशतले यो केस बढेको भियतनाम समाचारले बुधबार राष्ट्रिय मलेरियोलोजी, परजीवी विज्ञान र कीटविज्ञान संस्थानलाई उद्धृत गर्दै बताएको छ ।
संस्थानका निर्देशक होआङ डिन्ह कान्हका अनुसार औलो भएका २३ प्रान्तमध्ये १३ प्रान्तमा आयातित स्रोतबाट सङ्क्रमण देखिएको छ । यो भविष्यमा औलो रोकथाम र उन्मूलनका लागि चुनौती हो ।
कमजोर आर्थिक अवस्था, खाद्य स्वच्छता अभ्यास, व्यक्तिगत स्वच्छता र वातावरणीय स्वच्छताले रोग सर्ने जोखिम बढाउने र प्रकोप रोक्न स्वास्थ्य अधिकारीहरूको क्षमतालाई सीमित गर्ने उहाँले बताउनुभयो ।
संस्थानका अनुसार हाल भियतनामका एक हजार ३० कम्युनका औलो–स्थानीय क्षेत्रमा करिब ७० लाख मानिस बसोबास गरिरहेका छन् । यसमा अधिकांश गरिब र जातीय अल्पसङ्ख्यकहरू पहाडी, दुर्गम क्षेत्र, मध्य पहाडी क्षेत्र र सीमा क्षेत्रमा बसोबास गरिरहेका छन् ।
गत वर्ष यस मुलुकमा चार सय ४८ औलोका घटना रिपोर्ट गरिएको थियो । सन् २०३० सम्म औलो उन्मूलन गर्ने लक्ष्य हासिल गर्न भियतनाममा सन् २०२७ सम्म घरेलु औलो परजीवीहरूको थप केसहरू नहुनु पर्छ । रासस
