विश्व थाइरोइड दिवस सचेतनामुलक कार्यक्रम गरी मनाइयो [फोटोसहित]

चितवन । पछिल्लो समय आमनागरिकमा आएको स्वास्थ्य सचेतना र थाइरोइड रोग पहिचानको लागि आवश्यक परीक्षणको सहजताले गर्दा प्रभावित विरामीहरुको संख्या पनि धेरै देखा पर्न थालेको विज्ञहरुको भनाई छ । हरेक वर्ष मे २५ तारेखमा विश्व थाइरोइड दिवसलाई निकै महत्वका साथ संसारभर यो दिवस मनाउने गरिन्छ । नेपालमा पनि सचेतनामुलक कार्यक्रम सहित स्वास्थ्य संस्थाहरुले थाइरोइड दिवस २०२४ मनायका छन् ।

चितवनको भरतपुरस्थित रहेको पुष्पाञ्जली हस्पिटल प्रा.लि.ले पनि विगतका वर्षहरुमा जस्तै यो दिवसलाई रचनात्मकरुपमा कार्यक्रम सम्पन्न गरेको हस्पिटलका प्रबन्धक संचालक सुजन अधिकारीले बताउनु भयो । आज आफ्नै नवनिर्मित अस्पताल परिसरमा भएको कार्यक्रममा अस्पतालका बरिष्ठ फिजिसियन डा.भोजराज अधिकारी सहित प्रमुख कन्सल्टेण्ट मनोरोग विशेषज्ञ डा.सुनिल कुमार शाह, सिनियर कन्सल्टेण्ट स्त्री तथा प्रसूतिरोग विशेषज्ञ डा.राम प्रसाद सापकोटा,वरिष्ठ मुटुरोग विशेषज्ञ डा.विष्णुमणि धिताल,वरिष्ठ वालरोग विशेषज्ञ डा.किरण देवकोटा,नाक कान तथा घाँटीरोग विशेषज्ञ डा.लाल बहादुर गुरुङ ,रेडियोलोजिष्ट डा.नेहा विष्ट लगायतका चिकित्सकहरुले आ आफ्नो विद्यागत विषयमा थाइरोइड रोगको प्रभाव ,त्यसको पहिचान र स्वास्थ्य क्षेत्रमा भैरहेका नवीनतम उपचार अभ्यासका विषयमा कार्यअनुभव प्रस्तुत गर्नुभएको अस्पतालका निमित्त निर्देशक डा.किरण देवकोटाले जानकारी दिनुभयो ।

आयोजित सचेतना कार्यक्रमका प्रमुख विषय वक्ता वरिष्ठ फिजिसियन डा.भोजराज अधिकारीले थाइरोइड रोग अन्य रोग जस्तै विरामीको खानपान,जीवनशैली,वंशाणुगत गुण,रोगबारे सचेतनाको कमी जस्ता कुराहरुले प्रभाव पारेको बताउनुभयो । कुनै पनि रोगहरुको असरबाट प्रभाव विरामीप्रति परिवारका सदस्य,समाज र सरोकार निकायको सहयोगको आवश्यकता महत्वपूर्ण रहेको डा. अधिकारीको भनाई थियो । उहाँको अनुसार हर्मोन रोगहरु मध्ये थाइराइड रोग दोस्रो नम्वरमा देखापरेको साथै पुरुषको तुलनामा महिलाहरुमा यसको प्रभाव दुई गुणा बढी रहेको,विश्व स्वास्थ्य संगठनका अनुसार देशअनुसार कुल जनसंख्याको ४% देखि ८ % मा यस रोगको प्रभाव रहेको र नेपालको सन्र्दभमा कुल जनसंख्याको करिव ७ प्रतिशत मानिसहरुमा थाइराइड रोग देखा परेको बताउनु भयो ।

कार्यक्रममा भरतपुर महानगरपालिका वडा नं. १० का कार्यवाहक अध्यक्ष रेशमनाथ थापा,वडा नं.१२ का अध्यक्ष लेखराज पन्त,शिक्षाकर्मी प्रेम रिमाल र धर्मराज पौडेल लगायतले मन्तव्य राख्नुभएको थियो । कार्यक्रममा अस्पतालकी प्रमुख नर्सिङ कन्सल्टेण्ट वविता घिमिरेले स्वागत मन्तव्य राख्नुभएको हो । अस्पतालले आयोजना गरेको थाइराइड सम्बन्धि सचेतना कार्यक्रमलाई उल्लेख्य सहभागितामा सम्पन्न गर्न सहयोग गर्नुहुने सबै व्यक्ति तथा संस्थाप्रति अस्पतालका अध्यक्ष चेतनाथ वाग्लेले धन्यवाद प्रकट गर्दै कार्यक्रम समापन गर्नुभएको थियो ।