चितवन । नेपाल फर्मास्युटिकल एसोसिएसन (एनपीए) बाग्मती प्रदेशको आयोजनामा शनिबार चितवनमा फार्मासिस्टहरुका लागि एक दिने कार्यशाला सम्पन्न गरिएको छ ।
सामुदायिक र अस्पतालहरुमा गुणस्तरीय औषधि सुनिश्चिता र व्यवस्थापनका लागि ‘ईन्स्योरिङ मेडिसिन्स क्वालिटि इन कम्युनिटि एण्ड हस्पीटल फार्मेसीस एण्ड जिपीपी, जिएसडिपी विथ एक्सपाईरी म्यानेजमेन्ट’ विषयक कार्यशाला सम्पन्न भएको हो ।
कार्यक्रममा प्रमुख अतिथि एनपीएका अध्यक्ष ललित मोहन पन्त र अध्यक्षता बाग्मती प्रदेशका अध्यक्ष निर्मल रेग्मि रहनु भएको थियो । अध्यक्ष रेग्मीले फार्मेसीलाई सहज तरीकाले चलाउने विषयमा फर्मासिस्टहरु सजक हुनुपर्नेमा जोड दिनु भयो । फर्मासिस्टले सहि तरिका अवलम्बन गरी GPP(Good Pharmacy Practice) को अवधारणालाई आत्मसाथ गर्दै फार्मेसी चलाउनुको विकल्प नरहेको उहाँको भनाई थियो।
कार्यक्रममा पीक्यूयम् प्लसका सिनियर टेक्निकल एडभाइजर अच्युत विक्रम थापाले औषधीको गुणस्तर निर्धारण गर्ने विषयमा सबै पक्षको उत्तिकै हात रहेको बताउनु भयो । कार्यशालामा प्रशिक्षक समेत रहनु भएका थापाले विभिन्न टेस्टहरु फार्मेसीहरुमा नै टेस्ट गरी औषधिको गुणस्तर निर्धारण गर्ने कार्य शुरु गरिएको समेत जानकारी दिनुभयो ।
यस्तै प्रशिक्षक एबम् औषधी व्यवस्था विभाग वीरगञ्जका प्रमुख किरण सुन्दर बज्राचार्यले GPP अन्तर्गत फार्मेसीहरुमा बस्ने फार्मासिस्टहरुको नियत परिवर्तन हुनु पर्ने भन्दै प्रोफेसन् र अकुपेसनको बारेमा आफू प्रष्ट हुन आग्रह गर्नु भयो ।
एनपीए बाग्मती प्रदेशका सचिव सन्दिप पाठकले फर्मासिस्टहरुको क्षमता अभिवृद्धि कार्यक्रमले सकारात्मक परिवर्तन ल्याउन भुमिका खेल्ने भएकाले आगामी दिनमा समेत एनपिए ले फर्मासिस्टहरुका लागि विविध कार्यक्रम सञ्चालन गर्ने प्रतिबद्धता जनाउनुभयो ।
कार्यशालामा औषधीको गुणस्तर,म्याद नाघेका औषधी व्यवस्थापन र लागूऔषध व्यवस्थापन लगायत विविध विषयमा प्रशिक्षण दिइएको थियो । कार्यक्रममा ८६ जनाको सहभागिता रहेको थियो ।
