चितवन । चितवन मेडिकल कलेजको प्राविधिक सहयोग तथा फुजीमा लुब्रिकेण्टसको आर्थिक सहयोगमा अस्पतालमा निशुल्क स्तन क्यान्सर परीक्षण तथा सचेतना कार्यक्रम सम्पन्न गरिएको छ ।
शनिबार प्रोफेसर डाक्टर पंकज कुमार बर्मन सहितको टोलीले १६० जना महिलाको परीक्षण तथा अभिमुखिकरण गर्नुभएको थियो । कार्यक्रममा महिलाहरुको निःशुल्क मेमोग्राफी तथा एक्सरे सेवा समेत उपलब्ध गराईएको थियो । प्राडा बर्मनले रोग केहो, रोग लाग्ने कारण, उपचार तथा यसबाट बच्ने उपाय बारे अभिमुखीकरण गर्नुभएको थियो ।
सो क्रममा बोल्दै फुजीमा कम्पनीका व्यवस्थापक नबीन बस्नेतले कम्पनीले देशका धेरै शहरहरुमा यस किसिमका परीक्षण तथा शिविरका लागि संस्थागत सामाजिक उत्तरदायित्व अन्र्तगत सहयोग गर्दै आएको बताउनुु भयो । कन्ट्रोल लुब्रिकेन्टको उत्पादक कम्पनी फुजिमा आयल कम्पनीका मार्केटिङ म्यानेजर नबिन बस्नेतले लुब्रिकेन्टस् बिक्रीमा प्रतिलिटर एक रुपैयाँ स्तन क्यान्सर सचेतनामा खर्च गरिंदै आएको बताउनुभयो । आगामी दिनमा यस्ता कार्यमा कम्पनीले सहयोग गर्ने प्रतिबद्धता समेत जनाएको छ ।
