बाल सुधार गृहमा सात दिने योग ध्यान शिविर

बाँके । योग ध्यान कार्यक्रमका माध्यमबाट मानसिक स्वास्थ्य सेवा प्रवर्द्धनकालागि बाँके आयुर्वेद स्वास्थ्य केन्द्रले बाल सुधार गृह नौबस्तामा रहेका बालविज्याईकर्ताहरुलाई लक्षित गरी सात दिने योग -ध्यान शिविर सञ्चालन गरेको छ ।

बाँकेको नौबस्तामा रहेको बाल सुधार गृहका बालविज्याईकर्ताको मानसिक अवस्थामा सुधार ल्याउने उद्देश्यले साताव्यापी योग ध्यान कार्यक्रम सञ्चालन गरिएको बाँके आयुर्वेद स्वास्थ्य केन्द्रका प्रमुख डा गितार रेग्मीले जानकारी दिनुभयो ।

उहाँले योग ध्यानका माध्यमबाट बालविज्याईकर्ताहरुको मानसिक स्वास्थ्य सेवा प्रवर्द्धनका लागि कार्यक्रमको आयोजना गरिएको बताउनुभयो।

बाल सुधार गृहमा रहेका बालविज्याईकर्ताहरु कोरा कागज भएको र उनीहरुलाई समाजमा योग्य नागरिक बनाउँदै समाजमै पुनर्मिलन गर्न योग ध्यानका माध्यमबाट मानसिक स्वास्थ्य सेवा प्रबद्र्धन गर्न आवश्यक रहेको सुधार केन्द्रका प्रमुख श्याम बहादुर रानाको भनाई छ ।

बाँके बैजनाथ–३ का वडा अध्यक्ष निखिल बैगारले बाल मनोभावनालाई बुझेर उनीहरूमा रहेको नकारात्मक भावनालाई सकारात्मक ऊर्जामा बदल्नका लागि स्थानीय पालिकाले पनि सहकार्य गर्ने बताउनुभयो ।

बाँकेका सहायक प्रमुख जिल्ला अधिकारी जोरा सिंह माझीले सुधार केन्द्रमा रहेका बालविज्याईकर्ताहरुलाई योगका माध्यमबाट उनीहरूमा रहेको नकारात्मक विचार फाली सक्षम नागरिक बनाउन सबैको पहल हुनु पर्ने कुरामा जोड दिनुभयो।

बाँके आयुर्वेद स्वास्थ्य केन्द्रका डा शिवराज सुवेदीले सञ्चालन गरेको सो कार्यक्रममा सिताराम चौधरीले कार्यक्रममाथि प्रकाश पार्नु भएको थियो भने योग प्रशिक्षक गौरी शङ्कर मण्डलले योग प्रशिक्षण दिनुभएको थियो। कार्यक्रममा सय बढी बाल विज्याईकर्ताहरुको उत्साहपूर्ण सहभागिता रहेको थियो ।