खोटाङ । क्यान्सरपीडित गीतकार, कवि एवं प्राज्ञ टीका चाम्लिङको उपचारका लागि हङ्कङमा करिब रु छ लाख आर्थिक सहयोग जुटेको छ । खोटाङ सेवा समाज हङ्कङको पहलमा रु पाँच लाख ७३ हजार पाँच सय सहयोग रकम जुटाइएको जनाइएको छ ।
उक्त रकम किरात राई साँस्कृतिक कलाकार सङ्घ नेपालको रोहबरमा हस्तान्तरण गरिएको छ । उक्त कार्यक्रममा किरात राई साँस्कृतिक कलाकार सङ्घले सङ्कलन गरेको रु २८ हजार ६० समेत प्रदान गरेको जनाइएको छ ।
खोटाङमा जन्मिएर काठमाडौँलाई कर्मथलो बनाउनुभएका स्रष्टा चाम्लिङको उपचारका लागि खोटाङ सेवा समाज हङ्कङका उपाध्यक्ष धर्मराज राईको संयोजकत्वमा सहयोग सङ्कलन अभियान थालिएको थियो । दिक्तेल रुपाकोट मझुवागढी नगरपालिका–१३ नुनथला निवासी प्राज्ञ कवि तथा वरिष्ठ गीतकार चाम्लिङको क्यान्सर अस्पताल काठमाडौँमा उपचार भइरहेको छ ।
गीतसँगै कविता तथा कथा÷समालोचनामा उत्तिकै कलम चलाउँदै आउनुभएका चाम्लिङ नेपाल प्रज्ञा–प्रतिष्ठान, गीतकार सङ्घ नेपाल, बेलायती प्रतिभा प्रष्ठिानलगायतमा आबद्ध हुनुहुन्छ । चाम्लिङले राष्ट्रिय तथा अन्तर्राष्ट्रिय पुरस्कार हात पारिसक्नुभएको छ ।
चाम्लिङको उपचारका लागि खोटाङ कलाकार समाजकातर्फबाट दुई पटक गरी रु चार लाख ८५ हजार तीन सय ६६ सहयोग हस्तान्तरण गरिएको समाजका अध्यक्ष रुपकुमार राईले जानकारी दिनुभयो । “सहयोग सङ्कलन अभियान जारी छ । अहिले फेरि करिब रु तीन लाखजति सङ्कलन भइसकेको छ”, उहाँले भन्नुभयो ।
चाम्लिङले ‘हर्कजङ्ग–छलिशोभा किरात कला पुरस्कार-२०८१’ प्राप्त गर्नुभएको छ । कला-संस्कृति संरक्षक मनिकुमार राईले आफ्नो स्व बुबाआमाको स्मृतिमा स्थापना गर्नुभएको अक्षयकोषबाट रु २३ हजार तीन सय ३३ राशिको पुरस्कार चाम्लिङको काव्य कृति ‘बागी कविता’लाई प्रदान गरिएको हो ।
किरात राई साँस्कृतिक कलाकार सङ्घ केन्द्रीय कार्यसमितिको मातहतमा रहनेगरी विसं २०६८ मा स्थापना गरिएको पुरस्कार सङ्घको १९औँ स्थापना दिवसमा प्रदान गरिएको महासचिव पदम थुलुङले जानकारी दिनुभयो । रासस
