चितवन । नेपाल राष्ट्रिय मुटु तथा फोक्सो समाजले आयोजना गरेको अन्तराष्ट्रिय सम्मेलन चितवन जिल्लाको सौराहामा सम्पन्न भएको छ । सौराहास्थित होटल सेभेन स्टारमा मुटुको भिडियो एक्स–रे (ईकोकाडियोग्राफी ) सम्बन्धी आयोजित २ दिने अन्तराष्ट्रिय सम्मेलन सम्पन्न भएको हो ।
सम्मेलनको पहिलो दिन १२ जना मुटु रोग विशेषज्ञले मुटुरोगको पहिचान र उपचारमा मुटुको भिडियो एक्सरेको विकासले पुरयाएको महत्वपूर्ण भूमिकाबारे कार्यपत्र प्रस्तुत गर्नु भएको थियो । भने आज अन्तिम दिन २० जना चिकित्सकले आ-आफ्नो विषयमा कार्यपत्र प्रस्तुत गर्नुभएको हो । आज भयको सम्मेलनमा डा.शंकर लौडारीले क्यान्सर रोगको उपचारमा प्रयोग गरिने औषधि (केमो)ले मानव मुटुमा पार्ने प्रभावबारे पत्ता लगाउन मुटुको भिडियो एक्सरे मेसिनले महत्त्वपूर्ण भूमिका खेल्ने कार्यपत्र प्रस्तुतिमा जानकारी दिनुभयको थियो ।
डा.अमित चौरासियाले मुटुको एओट्रीक भल्भमा समस्या भयका बिरामीहरूको रोग पहिचानमा मुटुको भिडियो एक्सरेको महत्त्वबारे आफ्नो कार्यपत्र प्रस्तुत गर्नुभएको हो । डा.समीर गौतमले मुटुको भल्भ फेरेका बिरामीहरुमा मुटुको भिडियो एक्सरेको प्रभावकारिता र विदेशी चिकित्सक डा.गुरु प्रसादले मुटुको धड्कन बिग्रेका बिरामीहरुमा रोग पहिचान र उपचारमा यसको महत्त्वबारे कार्यपत्र प्रस्तुत गर्नुभएको थियो।
त्यस्तै गरी डा.अनिल आचार्यले मुटुको भिडियो एक्सरे मार्फत कार्डियोलोजी र कार्डियाक सर्जन बीच बिरामीको रोग पहिचान संगै उपचारमा सहजता भयको बताउनु भयो । डा.प्रकाशराज रेग्मीको अनुसार तालिम प्राप्त स्वास्थ्यकर्मीहरुको सहयोगले मुटुको भिडियो एक्सरे सेवा मार्फत मुटुको बाथ रोग पहिचान गर्न सहयोग मिलेको बताउनु भयो । त्यस्तै डा.उर्मिला शक्यका अनुसार जन्मजात मुटु रोग पहिचानको लागि मुटुको भिडियो एक्सरे निकै प्रभावकारी भइरहेको जानाकारी दिनु भयो । कार्यपत्र प्रस्तुत गर्ने क्रममा डा.अजित कुमार मिश्रले गर्भवती महिलाको पेटमा रहेको बच्चाको मुटुको स्वास्थ्य अवस्था पत्ता लगाउन यो प्रविधि निकै नै प्रभावकारी रहेको बताउनु भयो । कार्यक्रममा वरिष्ठ फोक्सो रोग विशेषज्ञ डा.शीतल अधिकारीले भिडियो एक्सरे मार्फत मुटु रोग जस्तै मानव फोक्सोको स्वास्थ्य अवस्था के कस्तो छ,भनी पत्ता लगाउन कोषेढुंगा साबित हुने बताउनु भयको थियो ।
सम्मेलनमा करिब ३२जना चिकित्सकले कार्यपत्र प्रस्तुत गर्नुका साथै कार्यक्रममा विदेशी अतिथि सहित नेपालका सय जना मुटु रोग विशेषज्ञ र स्वास्थ्यकर्मी सहित करिब दुइसयजनाको सहभागिता रहेको संस्थाका महासचिव डा.सचिन ढुंगेलले जानकारी दिनुभयो।
