भरतपुर । नेपाल सरकारका कार्यवाहक प्रधानमन्त्री प्रकाशमान सिंहले क्यान्सर रोगबाट प्रभावित बिरामीको रोग सम्बन्धी सचेतनामुलक
कार्यक्रम, रोगको पहिचान र उपचारमा सक्रिय भएर लाग्न क्यान्सर अस्पतालका चिकित्सक तथा कर्मचारीलाई आग्रह गर्नुभएको छ ।
भरतपुरस्थित बिपी कोइराला मेमोरियल क्यान्सर अस्पतालको २५औँ वार्षिकोत्सव तथा २०औँ राष्ट्रिय क्यान्सर सतर्कता दिवसका अवसरमा आयोजित कार्यक्रमलाई सम्बोधन गर्दै उहाँले यस अस्पतालले स्वास्थ्य र शिक्षामा पूर्याइरहेको योगदानको प्रशंसा गर्नु भयको थियो।
क्यान्सर अस्पतालमा बिरामीहरूको उपचारका लागि आवश्यक पर्ने लिन्याक र सिटी सिमुलेटरको उपकरण खरिद गर्न आफ्नो तर्फबाट सक्दो पहल गर्ने उपप्रधान एवं सहरी विकासमन्त्री सिंहले बताउनु भयो । उहाँले भन्नुभयो,“यो अस्पताल क्यान्सर रोगको उपचराका लागि अन्य देश जान नपरोस् भन्ने उद्देश्यका साथ स्थापना गरिएको हो । यसलाई अझै विरामीमैत्री बनाउनु पर्नेमा समेत जोड दिनुभयो।
कार्यक्रममा आफ्नो संस्थागत भनाई राख्दै अस्पतालका कार्यकारी निर्देशक डा.शिवजी पौडेलले नेपालमा रहेका क्यान्सर रोगका बिरामीमध्ये ५० देखि ६० प्रतिशतको उपचार यस अस्पतालमा हुने गरेको बताउनुभयो । २० प्रतिशत नेपालका अन्य अस्पतलाहरुमा र बीसप्रतिशत छिमेकी राष्ट्रसहित अन्य मुलुकमा उपचारका लागि जाने गरेको उहाँले जानकारी दिनुभयो । भविष्यमा यस अस्पताललाई ७०० शय्याको बनाउने योजना रहेको निर्देशक डा.पौडेलले बताउनु भयो।
क्यान्सर अस्पताल सञ्चालक समितिका अध्यक्ष डा.विजय राज न्यौपानेको अध्यक्षतामा सम्पन्न कार्यक्रममा २५ वर्षदेखि क्यान्सर रोग लागेर अहिले निको हुनुभएका बिष्णुप्रसाद पोडेल, अञ्जनी स्मृति अक्ष्यकोषका दाता तीर्थराज पराजुलीसहित चिनियाँ टोलीका चिकित्सकलाई कामको उच्च मूल्याङ्कन गर्दै सम्मान गरिएको थियो।
