ट्राफिक प्रहरीद्वारा सडकमै स्वास्थ्य परीक्षण अभियान सुरु

कपिलवस्तु । जिल्ला ट्राफिक प्रहरी कार्यालय कपिलवस्तुले यात्रु सुरक्षाका लागि ट्राफिक प्रहरीले सडकमै स्वास्थ्य परीक्षण अभियान सुरु गरेको छ ।

ट्राफिक प्रहरीले राजमार्गमा चल्ने सवारी चालकहरूको स्वास्थ्य अवस्थालाई ध्यानमा राख्दै सडक मै स्वास्थ्य परीक्षण अभियान सञ्चालन गरेको हो । यो अभियान अन्तर्गत ट्राफिक प्रहरीले लाइसेन्स र कागजात जाँच मात्र नगरी चालकको स्वास्थ्य पनि जाँच गरेको छ ।

शुक्रवारबाट सुरु भएको यस अभियानमा ८७ जना चालकहरूको दृष्टि र रक्तचाप परीक्षण गरिएको थियो । जसमा केही चालकमा आँखा र रक्तचाप सम्बन्धी समस्याहरू पाइएको छ । आँखाको दृष्टि, रङ्ग नचिन्ने र रक्तचापका समस्या देखिएको प्रहरीले जनाएको छ । समस्या भएका सवारी चालकलाई थप उपचारको लागि परामर्श गरिएको छन्द (कालेबाबु) नारायणी आँखा अस्पताल बहादुरगन्जका दृष्टि विशेषज्ञ चिकित्सक सुशील कार्कीले जानकारी दिनुभयो ।

छन्द (काले बाबु) नारायणी आँखा अस्पताल बहादुरगन्ज, गोरुसिङ्गे स्वास्थ्य चौकीको प्राविधिक सहयोगमा सवारी चालकको आँखाको दृष्टि र रक्तचापको परीक्षण गरिएको थियो ।

“चाडपर्वको समय रहेकोले यात्रु सुरक्षाको लागि विशेष योजना बनाएको र सवारी चेकजाँच, विद्यालय र समुदायमा सचेतनाका कार्यक्रमलाई अभियानको रूपमा सञ्चालन गर्ने योजना रहेको छ”, जिल्ला ट्राफिक प्रहरी कार्यालय कपिलवस्तुका प्रमुख प्रहरी निरीक्षक पङ्कज चुँदालीले भन्नुभयो । सडक जोखिमलाई कम गर्न सडक स्वास्थ्य चेकजाँच गरिएको उहाँले बताउनुभयो ।

उहाँका अनुसार चाडपर्वको समयमा यात्रुहरूको सुरक्षालाई मध्यनजर गर्दै विशेष योजनाहरू पनि बनाइएका छन् । यसले चालकहरूमा नियमित स्वास्थ्य परीक्षणको महत्त्वबारे सचेतना बढाउन सहयोग पुर्याएको छ ।

यो अभियानलाई जिल्लामा युनिटले सञ्चालन गर्ने योजना रहेको छ । कारबाही गर्ने, राजस्व सङ्कलन गर्ने मात्रै हाम्रो काम होइन । सिर्जनात्मक काम तथा सचेतना गर्ने र चालक, सहचालक, यात्रुको गुनासो तथा सुझाव लिएर दुर्घटनाको जोखिम समेत घटाउने लक्ष्य लिएको प्रहरी नायव निरीक्षक राघव सिंह राठौरले बताउनुभयो । सवारी दुर्घटनाको जोखिम कम गर्दै यात्रुहरूको सुरक्षामा सुधार पनि ल्याउनु आफ्नो दायित्व रहेको उहाँको भनाइ छ ।

सवारी चालकले बिहानदेखि बेलुकासम्म नै गाडी चलाउनुपर्ने हुन्छ । जसले गर्दा बिरामी नभएसम्म स्वास्थ्य जाँच गर्ने प्रचलन छैन । कहिलेकाहीँ मात्र नभई मासिक रूपमा यस्ता कार्यक्रम गर्नुपर्ने नवलपरासीका सवारी चालक लेखबहादुर राना मगरले बताउनुभयो ।

स्वास्थ्य जाँच कार्यक्रमले दुर्घटनाको जोखिम घटाउने र ट्राफिक प्रहरीको जिम्मेवारीलाई सिर्जनात्मक बनाउने उद्देश्यलाई साकार पार्ने अपेक्षा गरिएको छ । नियमित स्वास्थ्य चेकजाँचमा चासो नदिने सवारी चालक समेत लाभान्वित भएका छन् ।