नवलपरासी । कुष्ठरोग नियन्त्रण र जीवनस्तर सुधारका लागि पश्चिम नवलपरासीको रामग्राम नगरपालिकामा पाँचवर्षे परियोजना सुरू भएको छ ।
कुष्ठरोग नियन्त्रणका साथै कुष्ठ प्रभावितको स्वास्थ्य र जीवनस्तर सुधार गर्ने उद्देश्यका ‘द लेप्रोसी मिसन नेपाल’को आर्थिक तथा प्राविधिक सहयोग र रामग्राम नगरपालिकासँगको साझेदारीमा एकीकृत कुष्ठरोग तथा अपाङ्गता कार्यक्रम आगामी पाँच वर्षसम्म सञ्चालन भएको हो ।
सञ्चालन हुने परियोजनाअन्तर्गत समुदायमा कुष्ठरोग खोजी, उद्यमशीलता विकास, लघुउद्यम स्थापना, क्षमता अभिवृद्धि, मानसिक स्वास्थ्य, खानेपानी र सरसफाइ तथा स्वच्छता पूर्वाधार विकासलगायत विविध क्षेत्रमा काम हुने जनाइएको छ ।
रामग्राम नगरपालिकाका नगरप्रमुख धनपत यादवले नगरपालिकाले लिएको स्वास्थ्य तथा जीविकोपार्जनका लक्ष्य पूरा गर्न यस परियायेजनाले महत्वपूर्ण भूमिका निर्वाह गर्ने बताउनुभयो । जसका लागि करिब रु दुई करोड बराबरको कार्यक्रम रहेको संस्थाका ‘अप्रेशन’ प्रमुख पराजुलीले जानकारी दिनुभयो । रासस
