काठमाडौं । चन्द्रागिरि नगरपालिका–३ स्थित थानकोट स्वास्थ्य चौकीमा एम्बुलेन्स सेवा सञ्चालनमा आएको छ । चन्द्रागिरि–३ ले सो एम्बुलेन्स खरिद गरी स्वास्थ्य चौकीलाई हस्तान्तरण गरेको हो । सांसद राजेन्द्रकुमार केसीले वडाध्यक्ष दुर्गालाल महर्जनलाई एम्बुलेन्सको साँचो हस्तान्तरण गर्दै २४सै घण्टा एम्बुलेन्स सञ्चालनको व्यवस्था मिलाउन आफूले आर्थिक सहयोग गर्ने जानकारी दिनुभयो ।
समारोहमा नगरप्रमुख घनश्याम गिरीले कोरोना महामारीका समयमा नगरपालिकाले एम्बुलेन्स खरिद गरेर नगरवासीलाई निःशुल्क सेवा प्रदान गरेको जानकारी दिनुभयो । उहाँले भन्नुभयो “हस्तान्तरित एम्बुलेन्सले पनि वडाका साथै सम्पूर्ण नगरवासीलाई छिटो छरितो सेवा प्रदान गर्न सहयोग पु¥याउने छ ।”
यसैबीच नगरप्रमुख गिरीले चन्द्रागिरि–८ स्थित मातातीर्थमा नवनिर्मित आयुर्वेद औषधालय भवनको शुभारम्भ गर्नुभयो । योसँगै नगरपालिकाले वडा नं ६, ८, १२ मा पनि आयुर्वेदिक सेवा प्रदान गरिराखेको छ । नगरपालिकाले आयुर्वेदसम्बन्धी उत्पादन र बजारीकरण कार्यमा पनि सहयोग गर्ने जनाएको छ । नगरपालिकाले भौतिक पूर्वाधार, शिक्षा, स्वास्थ्य, खानेपानी, सम्पदा संरक्षण, पर्यटन प्रवद्र्धन, विपद् व्यवस्थापन, खेलकूदलगायतका संरचनागत विकासका क्षेत्रमा फड्को मार्न सफल भएको जनाएको छ ।
काठमाडौँ जिल्लाको सबैभन्दा ठूलो नगरपालिकाको रूपमा रहेको चन्द्रागिरिले गुर्जुधारामा आफ्नै नयाँ प्रशासकीय भवन बनाई कार्यालय सञ्चालन गरिससकेको छ । नगरपालिका भित्रका २४ सामुदायिक विद्यालयमध्ये २२ का भूकम्प प्रतिरोधी आधुनिक सुविधा सम्पन्न भवन बनेका छन् । नगरपालिकाले नगरवासीको स्वास्थ्यस्तर माथि उठाउन उच्च प्राथमिकता दिँदै थानकोटमा प्रसूति तथा स्त्रीरोगसहित अन्य विशेषज्ञ सेवा प्रदान गर्न अत्याधुनिक अस्पताल निर्माण गर्न लागेको छ । यसका लागि जर्मन विकास बैंक (केएफडब्लू) रु एक अर्ब बराबरको आर्थिक एवं प्राविधिक सहयोग गर्ने सम्झौतासमेत गरिसकेको छ । विसं २०७६ वैशाख २८ देखि चन्द्रागिरि–४ थानकोटमा नै १५ शय्याका अस्पताल सञ्चालनमा आइसकेको छ ।
