वागमती श्रेष्ठ
भरतपुर । रोट्रयाक्ट क्लब अफ चितवन मेडिकल कलेजको आयोजनामा भरतपुरस्थित चितवन मेडिकल कलेजको बेसिक साइन्सेस ब्लक कैलाशनगरमा दोस्रो संस्करणको नेशन वाइड प्याथोलोजी क्विज कार्यक्रम सम्पन्न भएको छ । उक्त कार्यक्रमलाई चितवन मेडिकल कलेज प्याथोलोजी बिभागको सहयोग रहेको थियो ।
रोट्रयाक्ट क्लब अफ चितवन मेडिकल कलेजका अध्यक्ष प्रसिद्ध शर्माको अध्यक्षतामा भएको कार्यक्रममा मेडिकल कलेजकी प्रमुख प्राध्यापक डा.ममता तिवारीको प्रमुख आतिथ्यता रहेको थियो । अन्य अतिथिको रुपमा प्राध्यापक डा.सुशना महर्जन,कलेजका कर्मचारी बिप्लव अधिकारी लगायतको उपस्तिथि रहेको थियो । क्विज प्रतियोगितामा ३९ वटा समुहबाट गरी करीब ११७ जनाको सहभागीता रहेको थियो भने ,देशैभरका विभिन्न मेडिकल कलेजहरुले प्रतिनिधित्व गरेका थिए । जसमा चितवन मेडिकल कलेज भरतपुर ,महाराजगञ्ज मेडिकल क्याम्पस काठमाडौं,बी.पी.कोईराला स्वास्थ्य विज्ञान प्रतिष्ठान धरान, काठमाडौं मेडिकल कलेज काठमाडौँ,पाटन एकेडेमी अफ हेल्थ साइन्सेस,काठमाण्डौ र मणिपाल कलेज अफ मेडिकल साइन्सेस पोखरा लगायतको उपस्थिति रहेको थियो ।
क्विज प्रतियोगितामा महाराजगञ्ज मेडिकल कलेज प्रथम,मणिपाल कलेज अफ मेडिकल साइन्सेस द्वितीय र बी.पी. कोईराला स्वास्थ्य विज्ञान प्रतिष्ठानले तृतीय स्थान हासिल गरेका छन् । विजेता प्रतियोगीहरूले क्रमश नगद रु.२५ हजार , १५ हजार र १० हजारसहित ट्रफी,पदक र प्रमाणपत्र प्राप्त गरेका थिए । विजेता टिमहरूलाई कार्यक्रमका प्रमुख अतिथि प्राध्यापक डा.ममता तिवारीले पुरस्कार प्रदान गर्नुभएको थियो । गत वर्ष २७ वटा टिमहरूको सहभागितामा पहिलो संस्करणको प्याथोलोजी क्विज उत्साहजनक रूपमा सम्पन्न भएकोले यस वर्ष पनि उक्त कार्यक्रमलाई निरन्तरता दिँदै दोस्रो संस्करणको क्विज सम्पन्न गरेको रोट्रयाक्ट क्लब अफ चितवन मेडिकल कलेजका अध्यक्ष प्रसिद्ध शर्माले जानकारी दिनुभयो ।
स्वास्थ्य क्षेत्रमा प्याथोलोजी विद्या निकै महत्वपूर्ण मानिन्छ । जसले विरामीको रोग पहिचान,रोगको अवस्था र उपचार पक्रियाको लागि थपसहजता प्रदान गर्दछ ,भने विभिन्न रोगका विषय विज्ञहरुलाई विरामीको उपचार अगाडि बढाउन धेरै सजिलो हुने गर्दछ । त्यसैले मेडिकल शिक्षा अध्ययन गरिरहेका विद्यार्थी बिच यस किसिमको प्रतियोगीताले विद्यार्थीहरुमा खोजअनुसन्धान र अध्ययन कार्यमा रुची बढ्ने विश्वास गरिएको छ ।
